Böyük Britaniyanın Birminhem şəhərində atletika üzrə dünya çempionatı davam edir. Apasport.az saytının məlumatına görə, qapalı manejdə keçirilən mundialda Azərbaycan da təmsil olunub.

Yığmamız çempionata 1 atletlə yollanıb. Bu, İslam Həmrəyliyi Oyunlarının gümüş medalçısı Aleksis Kopellodu. Milliləşdirilmiş 33 yaşlı kubalı 3 təkanla tullanma yarışında gücünü yoxlayıb.

17.17 metr nəticə göstərən Kapello medalın biraddımlığına qalıb. Belə ki, sözügedən nəticə ilə təmsilçimiz 4-cü pillənin sahibi olub. Bu yarışın qalibi 17.43 metrlə amerikalı Uill Klay olub. İkinciliyi braziliyalı Almir Dos Santos (17.41), üçüncü yeri isə portuqaliyalı Nelson Evora (17:40) qazanıb.

Qeyd edək ki, Kopello 2009-cu ildə dünya çempionatında ikinci olub. O, həmçinin Panamerika Oyunlarının qalibidi (2011).