Rusiyada keçiriləcək futbol üzrə XXI dünya çempionatının startına 7 gün qalır. Növbəti dosye Polşa millisi haqqındadı.
Polşa
FIFA sıralaması: 8-ci yer
Dünya çempionatlarında iştirak sayı: 7 (1938, 1974, 1978, 1982, 1986, 2002, 2006)
Dünya çempionatlarında oyun sayı: 31 (15 qələbə, 5 heç-heçə, 11 məğlubiyyət)
Vurulan-buraxılan qol sayı: 44-40
Ən yaxşı nəticə: Üçüncülük (1974, 1982)
Dünya çempionatlarında ən çox oyun keçirən polşalı futbolçu: Vladislav Jmuda – 21 oyun (1974, 1978, 1982, 1986)
Dünya çempionatlarında ən çox qol vuran polşalı futbolçu: Qjeqoj Lyato – 10 qol (1974 (7), 1978 (2), 1982 (1) )
Baş məşqçi
Adam Navalka: 60 yaş (23.10.1957)
1978-ci ildə Polşanı dünya çempionatında futbolçu kimi təmsil edən Adam Navalka 2013-cü ildən bəri millini çalışdırır. “Ağ-qırmızılar”ın tarixlərində ilk dəfə Avropa çempionatında 1/4 final görməsinə yardımçı olan 60 yaşlı mütəxəssisin həmçinin komandanın 2006-cı ildən sonra ilk dəfə mundiala yüksəlməsində də əməyi böyükdü. Onun rəhbərliyi dövründə Polşa millisi oynadığı 45 matçın 24-dən (53.33%) qalib ayrılıb.
Ulduz
Robert Levandovski: 29 yaş (21.08.1988)
10 matçda 16 qol – Robert Levandovski Avropa zonası üzrə DÇ təsnifat mərhələsinin ən məhsular futbolçusu idi. Adam Navalkanın “dünyanın ən yaxşı hücumçusu” adlandırdığı forvard təsnifat mərhələsinin gedişində milli tarixinin də ən məhsuldar futbolçusu statusunu ələ keçirdi. 2008-ci ildən bəri Polşa yığmasına çağrılan Levandovski bu müddət ərzində 93 matçda meydana çıxıb və 52 dəfə rəqib qapılarına yol tapıb.
Dünya çempionatına gedən yol: Həlledici məqamlar
2016-cı il, oktyabr
Sentyabrda Qazaxıstanla görüşdə qeydə alınan 2:2 hesablı bərabərlik bir anda – Danimarka və Ermənistanla oyunlardakı qələbələrin ardından unuduldu.
2017-ci il, mart
Çernoqoriya üzərində qazanılan 2:1 hesablı qələbə sayəsində Polşa qrupda birinci pilləyə yüksəldi.
2017-ci il, sentyabr
Danimarka Polşanı 4:0 hesabı ilə darmadağın edir. Sona üç tur qalmış ikinci pillə ilə arada olan xal fərqi üçə enir.
2017-ci il, oktyabr
Çernoqoriya ilə matçın sonuncu dəqiqələrində vurulan iki qol və 4:2 hesablı qələbə Polşanın Rusiyaya “bilet”i təmin etməsi anlamına gəlirdi.
Dünya çempionatına hazırlıq
Polşa mundial hazırlıqları çərçivəsində iki sınaq matçı keçirib. Nigeriyaya boyun əyən (0:1) “ağ-qırmızılar” Cənubi Koreyanı məğlub ediblər – 3:2. Polşa iyunun 8-də Çili, 12-də isə Litva ilə qarşılaşacaq.
Dünya çempionatı
Polşa Kolumbiya, Seneqal və Yaponiya milliləri ilə birlikdə H qrupunda mübarizə aparacaq.
Qrup mərhələsi
H qrupu
I tur
19 iyun
19:00. Polşa – Seneqal
“Otkrıtıe Arena”, Moskva
II tur
24 iyun
22:00. Polşa – Kolumbiya
“Kazan Arena”, Kazan
III tur
28 iyun
18:00. Yaponiya – Polşa
“Volqoqrad Arena”, Volqoqrad
Yekun iştirak ərizəsi
Qapıçılar: Lukaş Fabyanski (“Suonsi”, Uels), Voyçex Şesnı (“Yuventus”, İtaliya), Bartoş Byalkovski (“İpsviç”, İngiltərə);
Müdafiəçilər: Lukaş Pişek (“Borussiya”, Dortmund, Almaniya), Kamil Qlik (“Monako”, Fransa), Matsey Rıbus (“Lokomotiv”, Moskva, Rusiya), Artur Endjeyçik, Mixal Pazdan (hər ikisi “Legiya”), Tiaqo Çionek (“Spal”, İtaliya), Bartoş Bereşinski (“Sampdoriya”, İtaliya), Yan Bednarek (“Sauthempton” İngiltərə);
Yarımmüdafiəçilər: Yakub Blaşikovski (“Volfsburq”, Almaniya), Kamil Qrosiçki (“Hall Siti”, İngiltərə), Qjeqoj Krıxovyak (“Vest Bromviç”, İngiltərə), Slavomir Peşko (“Lexiya”), Pyotr Zielinski (“Napoli”, İtaliya), Karol Linetti (“Sampdoriya”, İtaliya), Yaçek Qoralski (“Ludoqorets”, Bolqarıstan), Rafal Kurzava (“Qurnik”);
Hücumçular: Robert Levandovski (“Bavariya”, Almaniya), Arkadiuş Milik (“Napoli”, İtaliya), Lukaş Teodorçuk (“Anderlext”, Belçika), David Kovnaçki (“Sampdoriya”, İtaliya).