“Formula-1” üzrə Azərbaycan Qran-prisi start götürüb. Apasport.az saytının məlumatına görə, artıq 3 pilot mübarizəni dayandırıb.

İlk olaraq Colion Palmerin yarışı davam etdirə bilməyəcəyi məlum olub. Bir gün öncə III sərbəst yürüşdə bolidinin mühərriki yanan “Renault”un pilotu ardınca baş tutan seçmə mərhələyə də qatıla bilməmişdi. Bu dəfə də mühərrikində tüstülənmə olan Palmer “pit-leyn”ə dönməli olub.

Ardınca rusiyalı Danil Kvyat da mübarizə ilə erkən vidalaşmalı olub. “Toro Rosso”nun pilotu da mühərrik problemindən əziyyət çəkib.

İlk iki sərbəst yürüşün qalibi Maks Ferstappen də yarışdan erkən ayrılıb. Mühərrik problemi ilə üzləşmiş “Red Bull”un pilotu yarışı yarımçıq saxlayan 3-cü iştirakçı olub.