30 Mart 22:40 "Zəfər kuboku"nda ilk gün: 4 qızıl, 1 gümüş, 3 bürünc medal
DÖYÜŞ NÖVLƏRİ xəbərləri 30 Mart 22:40
2027 baxış

"Zəfər kuboku"nda ilk gün: 4 qızıl, 1 gümüş, 3 bürünc medal

Türkiyənin Gebze şəhərində sərbəst, yunan-Roma və qadın güləşi üzrə yeniyetmələr arasında XXI Zəfər Kuboku beynəlxalq turniri keçirilir. Apasport.az Azərbaycan Güləş Federasiyasının saytına istinadən xəbər verir ki, turnirdə Türkiyə, İran, Gürcüstan, İtaliya, İsveç, Rusiya, Türkmənistan, Qazaxıstan, Macarıstan, Rumıniya, Bolqarıstan, Makedoniya, Argentina, Hollandiya, Qırğızıstan, Bosniya və Herseqovina ilə yanaşı, yığmamızın üzvləri də iştirak edir.

 

İlk yarış günündə sərbəst və yunan-Roma güləşi üzrə 48, 55 və 65 kq, qadın güləşi üzrə 43, 49 və 57 kq çəkidə 11 güləşçimiz xalça üzərinə çıxıb. Güləşçilərimiz günü 4 qızıl, 1 gümüş və 3 bürünc medalla başa vurub.

 

Yunan-Roma güləşi yarışlarında Qurban Qurbanov (48 kq), Murad Abbasov, Elmir Əliyev (hər ikisi 55 kq), Ruslan Hədisov və Elcan Məmmədov (hər ikisi 65 kq), sərbəst güləş yarışlarında Əlihəsən Əmirli, Riyad Aslanov (hər ikisi 48 kq), Əbülfəz Nəsirov (55 kq), Əşrəf Aşurov və Turan Bayramov (hər ikisi 65 kq) iştirak edib. Qadın güləşçilərin mübarizəsində Şahanə Nəzərova (43 kq), Sevinc Əhədova (49 kq) və Birgül Soltanova (57 kq) qüvvələrini sınayıb.

 

İlk yarış günündə qadın güləşçilərimizdən Birgül Sultanova (57 kq), sərbəst güləşçilərdən Əlihəsən Əmirli (48 kq), Əbülfəz Nəsirov (55 kq) və Turan Bayramov (65 kq) bütün rəqiblərini məğlub edərək finala yüksəlib. Finala yüksələn bütün idmançılarımız görüşlərini qələbə ilə başa vurub və yığmamıza qızıl medal qazandırıb.

 

Gümüş medalı isə yığmamıza 43 kq çəkidə mübarizə aparan Şahanə Nəzərova qazandırıb. 4 idmançının mübarizə apardığı bu çəki dərəcəsində yarışlar dairəvi sistem üzrə baş tutub.

 

Qadın güləşçilərimizdən Sevinc Əhədova (49 kq) Rumıniya idmançısına, yunan-Roma güləşçilərimizdən Murad Abbasov (55 kq) və Ruslan Hədisov (65 kq) öz komanda yoldaşlarına qalib gələrək turnirin bürünc medalını qazanıb.

 

Qadın güləşi

Final

43 kq - Zerda Demir (Türkiyə) - Şahanə Nəzərova 3:1

57 kq - Elmas Çelik (Türkiyə) - Birgül Sultanova 2:4

Bürünc medal görüşü

49 kq - Sevinc Əhədova - Amelin Popovic (Rumıniya) 4:0 tuşe

 

Sərbəst güləş

Final

48 kq - Əlihəsən Əmirli - Halil Gökdeniz (Türkiyə) 10:0

55 kq - Əbülfəz Nəsirov - Marcell Budai Kovacz (Macarıstan) 12:1

65 kq - Turan Bayramov - Tolga Akyüz (Türkiyə) 5:0

 

Yunan-Roma güləşi

Bürünc medal görüşü

55 kq - Elmir Əliyev - Murad Abbasov 0:9

65 kq - Ruslan Hədisov - Elcan Məmmədov 1*:1

Təsəlliverici görüş

55 kq - Cüzeppe Frontani (İtaliya) - Elmir Əliyev

65 kq - Marco Mercatali (İtaliya) - Ruslan Hədisov

Xəbər lenti