Azərbaycan Premyer Liqasında 2017-ci ilin ən yaxşı komandası müəyyənləşib. Apasport.az saytının məlumatına görə, 2016/17 mövsümünün ikinci, 2017/18 mövsümünün ilk yarısının nəticələrində “Qarabağ” hamını arxada qoyub.

Qurban Qurbanovun yetirmələri il ərzində keçirdiyi 28 qarşılaşmanın 21-də, yəni 75 faizində qalib gəlib. Yalnız 3 dəfə uduzan ağdamlılar cəmi 14 top buraxması ilə də hamıya nümunə olub.

Məhsuldarlıqda isə “Qəbələ” fərqlənib. 2017-ci ilin 3-cü komandası olan Roman Qriqorçukun yetirmələri “Qarabağ”dan 15 xal geri qalsa da, daha çox qol sevinci yaşayıb. “Qırmızı-qaralar” 46, Ağdam klubu 45 dəfə rəqib qapılarına yol tapıb.

“Qəbələ”ni cəmi 2 xal üstələyən “Zirə” 2017-ci ildə topladığı xalların sayında ikincidi. Qəsəbə təmsilçisi də 40-dan artıq qol vuranlardandı.

Ümumiyyətlə isə bitməkdə olan ildə 9 klub yüksək dəstədə çıxış edib. Onlardan ikisi – AZAL və “Səbail” 1, digərləri isə 2 mövsümün yarım hissələrində iştirak edib. İl ərzində Premyer Liqada 112 matç baş tutub ki, azarkeşlər də 263 qola şahid olublar. Orta məhsuldarlıq 2,348-ə bərabərdi.