“Bu gün axşam oteldə toplaşacağıq. Məşqlərimizi hansı stadionda keçirəcəyimiz isə hələ dəqiqləşməyib”. Bu sözləri apasport.az saytına açıqlamasında 17 yaşadək futbolçulardan ibarət yığma komandamızın baş məşqçisi Mirbağır İsayev deyib.
Bu ay Avro-2015-in elit-raund mərhələsinin oyunlarına çıxacaq millimiz sabahdan etibarən məşqlərə start verəcək. İsayevin sözlərinə görə, U-17 toplanış çərçivəsində təkcə məşqlərlə kifayətlənməyəcək. Hazırlıq müddətində yoxlama görüşlərinin keçirilməsi də nəzərdə tutulub: “Məşqlərlə yanaşı, yoxlama oyunlarında da uşaqları sınayacağıq. Planımızda iki görüş keçirmək var. Hər iki oyunda rəqibimiz I Divizion təmsilçisi olacaq. Amma hansı komandalarla qarşılaşacağımız hələlik bəlli deyil. Onu da deyim ki, ilk oyun martın 6-da, ikinci görüş isə 9-da keçiriləcək”.
Qeyd edək ki, elit-raund mərhələsinin 2-ci qrupunun bütün oyunları Azərbaycanda keçiriləcək. Mübarizəyə martın 17-də başlayacaq millimiz ilk sınaqda Xorvatiya ilə üz-üzə gələcək. İkinci görüş martın 19-da Portuqaliya, üçüncü matç isə ayın 22-də Serbiya yığmasına qarşı olacaq. Komandamız hər üç oyununu “Baksell Arena”da keçirəcək.