“Xəzər Lənkəran” Azərbaycan kubokunun 1/4 final mərhələsinin ilk oyunları çərçivəsində “İnter”in qonağı olacaq. Apasport.az saytının məlumatına görə, martın 4-də “İnter Arena”da baş tutacaq bu görüş Cənub klubunun ölkə kuboklarındakı sayca 64-cü matçı olacaq.

İndiyə qədər keçirdiyi 63 oyunda “ağ-yaşıllar” 38 dəfə qələbə qazanıb, 11 dəfə məğlub olub, 14 görüşü isə heç-heçə bitirib. Komanda bu qarşılaşmalarda rəqib qapılarına indiyə qədər 127 top vurub, öz qapısından 48-ini buraxıb.

“Xəzər Lənkəran” 2004-cü ildən bəri ümumilikdə 3 dəfə ölkə kubokuna sahib çıxıb və daha 2 dəfə finala qədər irəliləsə də, kuboku başı üzərinə qaldıra bilməyib. Belə ki, 2009/2010 mövsümündə “Bakı” və 2012/13 mövsümündə “Neftçi” ilə finalda qarşılaşan cənublular istəyinə çata bilməyib. Komanda 2 dəfə Ağasəlim Mircavadovun və bir dəfə rumın çalışdırıcı Mirça Rednikin rəhbərliyi altında kuboku Lənkərana gətirə bilib. (12cioyuncu.info)