"Söz yoxdu ki, 49 ildən sonra səni hansısa quruma rəhbərlərdən biri kimi dəvət edirlərsə, bu, sevindirici haldı. Mən də bir veteran futbolçu kimi öz təcrübəmi, biliklərimi cavan futbolçulara çatdırmağa çalışacam". Apasport.az saytının məlumatına görə, bu sözləri "Neftçi"nin Müşahidə Şurasının üzvü Mübariz Zeynalov deyib.

Topaz Premyer Liqasının XXVII turu çərçivəsində bu gün keçirilmiş "Neftçi" - "Bakı" matçının fasiləsində jurnalistlərin suallarını cavablandıran veteran futbolçu maraqlı fikirlər səsləndirib. Zeynalov Müşahidə Şurasının iclasında öz təkliflərini irəli sürəcəyini bildirib: "Neftçi" həmişə mənim qəlbimdədi. Ürəyimdən nələr keçirsə, həmin təklifləri irəli sürəcəm. Təkliflər çoxdu. Hələ birinci toplantımız olmayıb. Yığışanda hamısını deyəcəm. Dünən bizi ümumi yığdılar və bir qurum kimi təqdim etdilər. Yəqin ki, həftədə, 10 gündə bir dəfə yığılacağıq. Nə lazımdısa, hansı məsələlər müzakirə olunacaqsa, ona uyğun təkliflərimi irəli sürəcəm. Görüləsi çox iş var. İstərdik ki, "Neftçi" bundan da yüksəkdə olsun. Biz də bunun üçün çalışacağıq. Sadəcə, fikirlərimizi həyata keçirmək üçün bir az vaxt lazımdı".

Zeynalov Müşahidə Şurasının ilk iclasının aprelin 3-də keçiriləcəyini qeyd edib: "Mən sabiq futbolçu kimi məsləhətlərimi verəcəm. Futbolun taktikası var, texnikası var, bunlara Səməd Qurbanovla birlikdə biz cavabdehlik daşıyacağıq. Müəyyən işlər var ki, onlarla Müşahidə Şurasının digər üzvləri məşğul olacaqlar. Hələ bölgü olmayıb. Olandan sonra konkret biləcəyik ki, kim nə ilə məşğul olmalıdı. Aprelin 3-də, "Simurq"la oyundan öncə yığışacağıq və başlanğıc edəcəyik".

Veteran futbolçu azarkeşləri stadionlara cəlb etməyə çalışacaqlarını əlavə edib: "Azarkeşləri stadiona çəkmək üçün bu məsələnin üzərində işləmək lazımdı. Futbol ictimaiyyəti ilə sıx əlaqə yaradılmalıdı. Onlar futbola nə vaxt gəlirlər? Özlərinə qarşı hörmət, məhəbbət görəndə. Azarkeşlər futbolda əsas rol oynayırlar. "Bakı" ilə matçı 5-10 min azarkeş izləsəydi, daha maraqlı oyun gedərdi. Camaatı stadiona cəlb etmək üçün xalqın içində olmaq lazımdı".

Tengiz MƏMMƏDOV