“Hesada irəlidəydim. Son dəqiqələrdə bilmədim necə oldu, nə çatışmadı... Axırıncı dəqiqədə bir balaca arxayınlaşdım. Həm də, yarımfinalda zədələnmişdim”. Bu sözləri apasport.az saytına açıqlamasında I Avropa Oyunlarının gümüş mükafatçısı, Azərbaycan cüdoçosu Orxan Səfərov deyib.

60 kq çəki dərəcəsində finala qədər irəliləyən təmsilçimiz həlledici görüşdə rusiyalı Beslan Mudranova uduzaraq, ikinciliklə kifayətlənib.

Nailiyyəti ilə bağlı danışan Səfərov bildirib ki, müəllimləri ilə müzakirələrdən sonra  məğlubiyyətin səbəblərini müəyyən edəcəklər: “Zədədən sonra əzildiyimi hiss etdim. Üçüncü cəriməni ala bilərdim. Risk etdim ki, rəqibimi fəndə salım. Amma özüm düşdüm. Lakin yenə də bu, mənim üçün bəhanə deyil. Rusiyalı rəqibimlə mübarizəm normal gedirdi. Bütün rəqiblərimlə əvvəlcədən qarşılaşmışdım. Mudranovla ümumi hesabımız 1:1 idi. İndi o, önə keçdi”.

Avropa Oyunları eyni zamanda Avropa çempionatı statusunu daşıdığından, Səfərov bu yarışın da gümüş mükafatçısı adına layiq görülüb. İdmançımız bununla bağlı da fikirlərini bölüşüb: “Bizdə cüdo Rio Olimpiadasına lisenziya xalı verirdi, həm də Avropa çempionatı idi. Digər idman növlərindən fərqli olaraq, bizə iki medal verdilər. Builki Avropa çempionatını bu yarışa daxil ediblər. Buna görə də, bizdə ayrıca Avropa çempionatı olmayacaq”.