Bu gün Bakı-2015 I Avropa Oyunlarında çimərlik futbolu üzrə yarışlarda qrup mərhələsinin son oyunları keçirilib. Apasport.az saytının məlumatına görə, bugünkü nəticələrdən sonra yarımfinalçıların adlarına aydınlıq gəlib.  

A qrupunda çıxış edən Azərbaycan millisi 3-cü matçında da məğlub olub. Portuqaliya ilə qarşılaşan yığmamız 4:6 hesablı məğlubiyyətdən sonra qrup mərhələsini xalsız başa vurub. Nəticədə sonuncu yeri tutan komandamız 5-8-ci yerlər uğrunda mübarizə aparacaq.

Qrupumuzun qalibi adına isə Portuqaliya yiyələnib. 2-ci pilləni tutan İsveçrə də yarımfinala adlayıb.

B qrupunda isə hər şey axırıncı turda həll olunub. İtaliya Macarıstana qalib gəlməklə yarımfinala vəsiqəni əldə edib. Digər oyunda isə İspaniya ilə Rusiya yığmaları üz-üzə gəlib. Pireneyliləri heç-heçə də qane etsə də, şimallılar vacib qələbə qazanaraq, yarımfinala yüksəlib.

Qeyd edək ki, sabah keçiriləcək yarımfinalda İtaliya – İsveçrə və Portuqaliya – Rusiya cütləri üz-üzə gələcək. 5-8-ci yerlər uğrunda mübarizə aparan komandalar da sabah qarşılaşacaq. Azərbaycan millisi İspaniya, Ukrayna Macarıstanla münasibətlərinə aydınlıq gətirəcək.

Çimərlik futbolu, III tur

26 iyun

A qrupu

İsveçrə - Ukrayna - 5:4

Azərbaycan – Portuqaliya - 4:6

B qrupu

İtaliya – Macarıstan - 5:4

Rusiya – İspaniya - 5:3