“Bizim deviz ondan ibarətdi ki, şahmat siyasətdən kənardı”. Apasport.az saytının məlumatına görə, bunu Rusiya Şahmat Federasiyasının prezidenti, FİDE-nin vitse-prezidenti Andrey Filatov deyib.
Rusiya mətbuatına müsahibəsində gələn il Bakının ev sahibliyi edəcəyi Olimpiadadan danışan Filatov bildirib ki, Azərbaycan və Ermənistan arasındakı problem yarışın yüksək səviyyədə keçirilməsinə hansısa maneçilik törətməyəcək: “Bakı çox qonaqpərvər şəhərdi. Orada həmişə möhtəşəm təşkilatçılıq olub. Düşünürəm ki, Ermənistan millisi də qonaqpərvərlik hiss edəcək və hər şey yüksək səviyyədə baş tutacaq”.
FİDE-nin vitse-prezidenti yarışa hazırlığın da yüksək səviyyədə getdiyi qənaətindədi: “Hələlik biz həm Bakı, həm də İrəvanda Olimpiadaya hazırlığın yüksək səviyyədə aparıldığını müşahidə edirik. Bu üzdən düşünmürəm ki, 2 ölkə arasındakı münasibətlər Olimpiadanın keçirilməsinə mane olsun”.