Portuqaliya yığmasının heyətində Avropa çempionu olan və Bakını kubokla tərk edən Dieqo Dalot oyundan sonra apasport.az saytının əməkdaşının da suallarını cavablandırıb.
- Turnirlə bağlı təəssüratlarınızı bilmək istərdik…
- Çətin bir çempionat alındı. Maraqlı oyunlar keçirdik. Ən əsası, buranı arxasınca gəldiyimiz qənimətlə tərk edirik. Avropa çempionu olmaq karyeramıza başlayan zamankı arzumuz idi. Bunun üçün də sevinirik.
- Qitə birinciliyində sizin üçün ən çətin oyun hansı oldu?
- Fikrimcə, İspaniya ilə oyun həm maraqlı, həm də çətin keçdi. Final oyunu ən yaddaqalan oyunumuz oldu.
- Bəs oyunların keçirildiyi Bakı şəhəri haqda nə deyə bilərsiniz?
- Maraqlı şəhərdi. Xüsusilə də insanları haqda xoş sözlər söyləmək istərdim. Çox istiqanlı insanları var. Onlarla qarşılaşmaq xoş oldu.
- Portuqaliya finalaqədərki oyununu nümayiş etdirə bilmədi. Buna nə mane oldu? İki eyniüslublu komandanın dueli, yoxsa...?
- Rəqibimiz güclü komanda idi. Ona görə oyunumuzu göstərə bilmədik. Onlar buna imkan vermədilər.
- Qələbədən sonra Portuqaliyanın ulduz futbolçularından kimlər sizi təbrik etdi?
- Açığı təbrik edən olmadı. Bilirəm ki, hər birinin ürəyi bizimlə birgə döyünür. Onlar da qələbəmizə sevinirlər.
- Maraqlıdır ki, turnirdə ilk qolunuzu məhz finalda buraxdınız. Nə baş verdi?
- Əsas odur ki, qol buraxdıqdan sonra toparlana bildik. Uşaqlarla danışdıq ki, ikinci qolu buraxmayaq. Müdafiədə diqqətli oynadıq və buna imkan vermədik. Sonda isə Bakını kubokla tərk etməyə nail olduq.
- Buna qədər hansısa ciddi turnirdə iştirak etmişdinizmi?
- Bu ilk ciddi turnirim və uğurumdu. İlklər isə hər zaman yadda qalır.