“Real”ın baş məşqçisi Zinəddin Zidan Çempionlar Liqasının (ÇL) ən uğurlu debütantları sırasına qoşula bilər. Apasport.az saytının məlumatına görə, bunun üçün fransalı mütəxəssisin komandası ÇL-in finalında “Atletiko” üzərində qələbə qazanmalıdı.
Belə olarsa, Zidan baş məşqçi kimi debüt etdiyi mövsümdə ÇL-i qazanan 8-ci mütəxəssis olacaq. Maraqlıdı ki, bundan öncəki çempion debütantlardan 3-ü məhz “Real”ın “sükanı” arxasında Çempionlar Liqasının qalibi olub. Sonuncu dəfə isə 2009-cu ildə baş məşqçiliyə başlayan Xosep Qvardiola ilk mövsümündəcə “Barselona”nı Avropanın ən güclüsü etmişdi.
İndiyə qədər Xose Vilyalonqa (“Real” - 1956), Migel Munyos (“Real” - 1960), Toni Barton (“Aston Villa” - 1982), Co Feqan (“Liverpul” - 1984), Qus Hiddink (PSV - 1988), Visente del Boske (“Real” - 2000) və Xosep Qvardiola (“Barselona” - 2009) debüt mövsümündə ÇL-in kubokunu başı üzərinə qaldırmağı bacarıb.
Qeyd edək ki, “Real” – “Atletiko” matçı mayın 28-də keçiriləcək.