Milli komandanın futbolçusu Qara Qarayev Makedoniya ilə oyundan sonra (1:3) apasport.az saytının əməkdaşının da suallarını cavablandırıb.

- Oyun haqqında nə deyə bilərsən?

- Yaxşı hazırlaşmışdıq. Baş məşqçinin göstərişlərini yerinə yetirməyə çalışırdıq, ancaq ilk hissədə iki səhv etdik və qapımızda qol gördük. İkinci hissədə isə bir neçə şansımız oldu. Fərqi azaltmağı da bacardıq. Matçı qaytarmaq istərkən üçüncü qolu buraxdıq ki, bu da normal haldır. Danışılacaq çox şey yoxdur. Bəzi oyunçularda çempionatın yorğunluğu qalıb. Növbəti oyuna qədər müəyyən vaxtımız var və bunu atıb tam dincəlmək lazımdı.

- Artıq ikinci oyundu ki, reytinqdə bizdən zəif olan komandaya qalib gələ bilmirik...

- Biz futbolçular olaraq bunu mütləq düşünməliyik. Belə komandalara qarşı “xal itirmək” olmaz.

- Belə səhvlər edirik, asan məğlub oluruq. 3 ay sonra da seçmə oyunlar başlayır. Ehtiyanlanmalıyıqmı, səncə?

- Düçünürəm ki, belə oyunlarda səhvlər etməyimiz daha yaxşıdır, nəinki vacib oyunlarda. Hər səhvimizi analiz etməliyik. Hər işdə bir xeyir var. Ola bilsin ki, indi məğlub olduq, ancaq səhvlərimizi analiz edib tsiklə daha ciddi hazırlaşacağıq.

- Kanada ilə oyun haqqında nə deyə bilərsiniz?

- Onlar haqqında danışılacaq çox şey yoxdu. Bir neçə bilinən oyunçuları var. “Beşiktaş”da oynayan Atiba, məsələn. Makedoniyadan daha yaxşı komandadır.

- Bizi növbəti məğlubiyyət gözləyir?

- Rəqibin adı məğlubiyyət demək deyil. Güclü komandaya qarşı daha yaxşı hazırlaşırıq. Bu oyunun digər iki matçdan fərqli olacağını düşünürəm.