“Bu oyuna ciddi hazırlaşmışdım. Məqsəd qələbə qazanmaq idi. Yəni bu gün heç-heçə deyil, qələbə qazanmaq barədə düşünürdüm”. Apasport.az saytının məlumatına görə, bunu şahmat üzrə Azərbaycan millisinin üzvü Eltac Səfərli deyib.

Vüqar Həşimovun xatirəsinə həsr olunan “ShamkirChess 2016” turnirində Səfərli Hollandiya təmsilçisi Aniş Giriyə uduzub. Azərbaycan çempionu məğlubiyyətə layiq olmadığını deyib: “Debütdə Girini təəccübləndirmək istədim, amma alınmadı. Fiqurları dəyişəndən sonra cüzi üstünlük əldə etdim. Heç-heçə edə bilərdim, sadəcə qələbə qazanmaq istədiyimdən mübarizəni davam etdirdim. Yekunda məğlub oldum. Səhv gedişlər istəyimə mane oldu. Heç-heçə təklif etmədim ki, qələbə qazanım. Sonda xalsız qaldım. Şəmkirdə təşkilatçılıq yüksək səviyyədədi. Şahmatçılar üçün hər cür şərait yaradılıb. Əsl şahmat turnirinə layiq imkanlar var. Bu dəfə turnirə dostum Nicat Abasovla gəlmişəm. O yarış zamanı həm də mənə kömək edir. Rəqiblərə qarşı birgə hazırlaşırıq. Uzun müddət bir-birimizi tanıyırıq. Fikrimcə, tandemimiz pis alınmayıb".

Hollandiya təmsilçisi Aniş Giri isə qələbə qazanmağın hər zaman xoş olduğunu vurğulayıb: "Eltacla diqqətli oynadım. Hiss edirdim ki, səhvimi gözləyir. Ona görə bir gedişi dəfələrlə sayırdım. Sonra üstünlük qazanmağa imkan oldu və mən bu fürsəti qaçırmadım. Oyunumuz maraqlı alındı və yekunda rəqibi mat etdim. Növbəti 4 tura ciddi hazırlaşacam. Bu ilki turnirdə mükafatçılar sırasında yer almaq istəyirəm".