Fransada keçirilən Avropa çempionatının ilk finalçısı artıq məlumdu. Apasport.az saytının məlumatına görə, yarımfinal mərhələsində Uels üzərində (2:0) qələbə qazanan Portuqaliya yığması həlledici qarşılaşmada iştirak hüququ əldə edib.
Dünənki görüşün ən yaxşısı isə portuqaliyalıların kapitanı Kriştianu Ronaldo olub. 1 qol və 1 məhsuldar ötürmə ilə komandasının hər iki qolunda yaxından iştirak edən Ronaldo UEFA tərəfindən görüşün qəhrəmanı elan edilib.
Bununla cari qitə birinciliyində 2-ci dəfə belə ada layiq görülən CR7 ümumilikdə 5-ci dəfə Avropa çempionatlarında hansısa oyunun ən yaxşısı seçilir.
Avropa çempionatları tarixində ən çox matçın oyunçusu seçilən futbolçu isə 6 dəfə ilə Andres İnyestadı. Ronaldo finalda da bu uğuru təkrarlayarsa, ispaniyalının rekorduna şərik olacaq.
Qeyd edək ki, matçın ən yaxşısı nominasiyası 1996-cı ildən tətbiq edilir.