Rio-2016-da yunan-Roma güləşi üzrə yarışlara yekun vurulub. Apasport.az saytının məlumatına görə, 3 gün ərzində davam edən mübarizədə 6 dəst medalın sahibi müəyyənləşib.

Ümumilikdə oynanılan 24 mükafatın ikisi Azərbaycan idmançılarına nəsib olub. Rəsul Çunayev 66 kq, Sabah Şəriəti 130 kq çəki dərəcəsində 3-cü yerlə kifayətlənib. İki bürünc medal qazanan milli komandamız 5 idmançı ilə qatıldığı bu növdə 9-cu yerə şərik olub.

Yığmamız daim favoritlər sırasında yer alan İranla eyni göstəriciyə malikdi və hər iki qonşu ölkə medal sıralamasında ilk “onluğ”un son pillələrinə - 9-10-cu yerləri bölüb.

Rio-2016-nın 24 medalını 16 ölkə təmsilçisi qazanıb. Yalnız Kuba və Rusiya 3 dəfə fəxri kürsüdə yer alıb ki, hər iki ölkə 2 çempionluğa sevinib. Amma mərkəzi amerikalılar 3-cü medalın əyarına görə ən yaxşı olub. 6 çəki dərəcəsində qızıl medallar isə 4 ölkə təmsilçisinə nəsib olub.

Rio-2016 yunan-Roma güləşində medallar

İki medal qazanan yunan-Roma güləşi üzrə Azərbaycan millisi son Olimpiya Oyunları ilə müqayisədə geriləməkdə davam edib. 1996-cı ildə müstəqil ölkə kimi ilk dəfə dördilliyin ən mötəbər yarışına qatılan yığmamız debütdə və 2000-ci ildə medala həsrət qalsa da, ardıcıl 4 Olimpiadadı medalsız qalmır. Amma bu mükafatlar əyarının dəyəri baxımından yarışdan-yarışa geriləyir. Bu növdə yeganə qızılımız 2004-cü ilə təsadüf edibsə, 2008-də 2 gümüş, 2012-də isə sonuncu finalımıza sevinmişik. Bu dəfə isə komandamız 16 ildən sonra ilk dəfə Olimpiada ilə qızıl üçün döyüşmədən vidalaşdı.

Qeyd edək ki, yunan-Roma güləşçilərimiz Olimpiadalardakı medal sayını 7-yə çatdırıb. Bunlardan biri qızıl, 3-ü gümüş, 3-ü bürüncdü.

Azərbaycan yunan-Roma güləşi yığması Olimpiadalarda