Bu gün kişi voleybolçular arasında Azərbaycan Yüksək Liqasında III dövrənin son oyunları keçirilib. Apasport.az saytının məlumatına görə, XV turun mərkəzi matçında “Neftçi” “Lokomotiv”lə üz-üzə gəlib.

Qarşılaşmanın qalibi əvvəlki matçlarda olduğu kimi tay-brekdə müəyyənləşib. “Dəmiryolçular” rəqiblərini 3:2 hesabı ilə məğlub ediblər.

Günün digər oyununda “Naxçıvan” MOİK-lə münasibətinə aydınlıq gətirib. Birincilər ilk 2 seti qazansalar da, ardını gətirə bilməyiblər. Təcrübə öz sözünü deyib və MOİK qələbə qazanıb.

Beləliklə, çempionatın əsas hissəsi “Neftçi”nin liderliyi ilə başa çatıb. Onlar ən yaxın izləyiciləri "Lokomotiv"i 1 xal qabaqlayıblar. Bu komandalarla yanaşı, MOİK və “Naxçıvan” da mübarizəni pley-offda davam etdirəcək.

Qeyd edək ki, iki dövrədən ibarət olacaq pley-off mərhələsinin ilk dövrəsi martın 15-17-də, son oyunları isə həmin ayın 28-30-da olacaq. 

3 mart

XV tur

“Naxçıvan” - MOİK – 2:3 (26:24, 25:22, 23:25, 24:26, 13:15)

“Neftçi” – “Lokomotiv” – 2:3 (23:25, 25:19, 19:25, 25:20, 11:15)

“Sumqayıt” – “Nəqliyyatçı” - 0:3 (0:25, 0:25, 0:25)