Azərbaycan millisinin Almaniya ilə qarşılaşma üçün çağırılan heyətinin statistik göstəriciləri açıqlanıb. Apasport.az saytının məlumatına görə, martın 26-dakı görüşə dəvət edilən 26 oyunçudan 25-i əvvəllər də əsas komandada forma geyinib.

Yalnız 18 yaşlı Renat Dadaşov Bundetsimlə Bakıdakı görüşdə debüt imkanı qazanacaq.

Oyunçular arasında rekord isə Rəşad Sadıqova məxsusdu. Hesabında 106 matç olan 35 yaşlı müdafiəçi 107-ci oyununa çıxa bilər. Bununla da kapitan millidə ən çox matç keçirən futbolçuların dünya sıralamasında 263-cü yerə şərik olacaq. Sadıqov 107 qarşılaşma keçirən 8 futbolçuya qoşulacaq. Onlar arasında Patrik Vieyra, Eşli Koul kimi tanınmış simalar da var.

Millimizin digər üzvlərindən Ruslan Abışov 50-ci, Bədavi Hüseynov 40-cı dəfə yığmanın heyətində meydana çıxa bilər.