Azərbaycan millisi tarixinin yeni rekorduna imza atıb. Apasport.az saytının məlumatına görə, seçmə mərhələlərdə ilk dəfə yığmamızın xal hesabı iki rəqəmli ədədlə ifadə olunub.

Belə ki, San-Marinonu məğlub edən komandamız aktivini 10 xala çatdırıb. Bu nəticə Avropa səviyyəsində aşağı göstərici olsa da, millimiz üçün görünməmiş nailiyyətdi.

Məsələ ondadı ki, AÇ-1996-dan beynəlxalq arenaya çıxan komandamız qrupda son sıralarda var-gəl edib və xal ehtiyatı ilə öyünə bilməyib. Əvvəlki 11 seçmə tsikldə ən yaxşı halda 9 xal toplamışıq. Bu da DÇ-2014-ün seçmə mərhələsinə təsadüf edib.

San-Marino ilə qarşılaşmayadək hesabında 7 xal olan millimiz qələbə ilə bu rəqəmi 10-a çatdırıb və 4 il öncəki rekordu 1 xal üstələyib. Qarşıda hələ iki matçı olan komanda Çexiya ilə ev və Almaniya ilə səfər görüşlərində rekordu daha da yaxşılaşdıra bilər.

Qeyd edək ki, 10 xalı 8 oyunda qazanan millimiz San-Marinodan 6 (1:0 və 5:1), Norveçdən 3 (1:0), Çexiyadan 1 (0:0) xal alıb.