“Zirə”nin hücumçusu Riçard Qadzenin apasport.az saytına müsahibəsi
- Qış fasiləsinə qədər qazandığınız nəticələri və göstərdiyiniz oyunu qaneedici hesab edirsinizmi?
- Maraqlı iki dövrə keçdi. Oyunlar gərginliyi ilə yadda qaldı. Açığı, komandalar bir-birilərinə kifayət qədər müqavimət göstərdilər. Çalışdıq ki, hədəfimizdən uzaq düşməyək. Əgər fasiləyə ilk “3-lük”də getmişiksə və ən yaxın izləyicimizi 10 xal qabaqlayırıqsa, nəticənin qaneedici olduğunu demək olar.
- Hansı axsamalar daha yüksək pillədə yer almağınıza mane oldu?
- Hazırda turnir cədvəlində üçüncü pillədə yer almışıqsa, deməli, ilk 2 dövrə bizim üçün pis keçməyib. Bu bizi qane edirsə, hansısa axsamadan, zəif çıxışdan danışmaq mümkün deyil.
- Aydın məsələdi ki, qış fasiləsindən sonrakı dönəm daha çətin keçəcək. Geridən gələn komandaların hansından ehtiyatlanırsınız?
- Hansısa komandanı fərqləndirmək düzgün deyil. Çünki onların hamısı bizim üçün rəqibdi. Onları zəif-güclü deyib, ayırmırıq. Hamısına güclü komanda kimi baxırıq. Çünki fərqi yoxdu kiminlə oynayırsan, uduzursansa, 3 xaldan məhrum olursan. Onda rəqibin zəif və ya güclü olduğunu nəzərə almırlar.
- “Zirə” üçün əsas sima hesab edilən və vurduğu qollarla vacib xallar qazandıran Təmkin Xəlilzadənin “Qəbələ”yə transferi komandanızı zəiflətməyəcək?
- “Zirə” hansısa futbolçudan asılı komanda deyil. Düzdü, Təmkin bizim üçün vacib futbolçu idi. Ancaq şans verildiyi zaman hər kəs özünü yaxşı tərəfdən göstərməyə qadirdi.
- Bundan sonrakı tapşırıq hazırkı mövqeyi qorumaqdı. Maksimum üçün mübarizə aparmamaq motivasiya baxımından çətinlik yaratmayacaq?
- Bizə çempionatı mükafatçılar sırasında başa vurmaq lazımdı. Bunun üçün hələ 14 oyun keçirməliyik. Çətin olacaq, amma tapşırığın öhdəsindən gəlmək, yenidən Avropa Liqasında oynamaq istəyirik. Motivasiya ilə bağlı problem yaşamayacağıq.
- Qış fasiləsinə qədər 6 qol vurmusunuz. 14 matçda bu göstərici bir hücumçu üçün zəif deyil?
- Qışa qədər 6 qol vurmuşam və bir neçə məhsuldar ötürmə vermişəm. Açığı, özüm üçün pis göstərici deyil. Fasilədən sonra qollarımın sayını artımalıyam. Çünki yekunda bombardir olmaq istəyirəm.
- Bəzi futbolçular süni örtükdə oynamaqdan şikayətlənirlər. Sizin belə probleminiz varmı?
- Klub ev oyunlarını belə örtüklü meydançada keçirir. Bunu əvvəlcədən bilirdik. Çalışırıq problem yaranmasın. Ancaq bundan tam qaçmaq mümkün deyil. Bəzən süni meydançada oynamaq çətin olur.
- Çempionatla bağlı necə, xüsusi qeyd etmək istədiyiniz məqam varmı?
- Premyer Liqanın perspektivi çox yüksəkdi. Ötən illə müqayisə etsək, cari çempionat bizim üçün yaxşı keçir. İstedadımı və bacarığımı nümayiş etdirmək üçün Premyer Liqa möhtəşəm çempionatdı.