[b]Qurbanov seçdi, siz də seçilin![/b]
16.03.2018 - 11:30
[b]Qurbanov seçdi, siz də seçilin![/b]

İlk dəfə yığmamızın heyətinə irad bildirən olmadı. İlk dəfə ürəkdən “nəhayət ki, ədalətli seçim gördük” deyildi.

 

Qurban Qurbanovun millinin “sükanı arxası”na keçməsi ümidini üzən futbolçularda belə, yenidən həvəs yaratdı. Çünki ədalətli insan və məşqçi kimi tanınan, bu üzdən sevilən, seçilən çalışdırıcının yenə heç kimə haqsızlıq etməyəcəyinə inam böyük idi. Belarus və Makedoniya ilə yoldaşlıq görüşləri üçün açıqlanan heyət bu düşüncələri bir daha təsdiqlədi. Qurbanov hətta bir çox mütəxəssisin “yığmalıq deyil” dediyi oyunçulara da dəvət göndərdi.

 

Razılaşaq ki, Berti Foqtsun gəlişindən sonra millimizdə nizam-intizam formalaşdı, komandamıza hörmət birə-beş artdı. Amma Foqts ayın ən azı 25 gününü ölkəsində qolf oynamaqla, sevimli komandası “Borussiya”nın (Mönhenqladbax) oyununu stadiondan izləməklə keçirirdi. Açıqlanan heyətdən, bəlkə də, ən son özü xəbər tuturdu. Əminəm ki, klublardakı yerli futbolçuların çoxlarını heç tanımırdı. Bəlli adlar var idi ki, klubunda meydana çıxdı-çıxmadı, yığmada yeri hazır idi.

 

Onun xələfi Robert Prosineçki milli üzvlərinə cəsarət gətirdi, istənilən rəqiblə qorxmadan oynamağı öyrətdi. Amma onun da xüsusi rəğbət bəslədiyi, sevimli futbolçuları var idi. Prosineçki sələfindən fərqli, çempionat matçlarını daim izləyirdi (son dönəmlər istisna), ancaq onun da seçimləri hər dəfə müzakirə olunur, sevimlilərindən əl çəkməməsi yaxşı formada olan bəzi oyunçuların yolunu bağlayırdı.

 

Qurban Qurbanov isə həm nizam-intizama böyük önəm verməsi, həm də “Qarabağ”dakı nəticələri ilə cəsarətləndirdi. Özü də təkcə milli üzvlərini yox, bütün azərbaycanlı futbolçuları. Onun son heyəti “hamını izləyirəm, adından, yaşından asılı olmayaraq hər kəsə dəvət göndərə bilərəm” mesajı idi.

 

Foqtsun varlığından xəbərsiz olduğu, Prosineçkinin “fəlsəfəmə uyğun deyil” dediyi oyunçular belə, artıq yığma formasını geyinmək imkanı qazanırlar. Yenilərdən Asif Məmmədov, Tural Axundov, Rahil Məmmədov və ya Şəhriyar Rəhimov, bəlkə də, millinin baş məşqçisinin fəlsəfəsinə uyğun deyil. Amma klublarında müntəzəm oynamaları, özlərini bir balaca yaxşı tərəfdən göstərmələri dəvətlilər arasında olmaq üçün kifayət edib. Adıçəkilənlərdən Asif və Şəhriyar bundan da yaxşı durumda olarkən yığmadan kənarda qalardılar. Asif Məmmədovun 32, Tural Axundovun 30 yaşının olması da debüt şansına mane olmadı.

 

Bəxtiyar Həsənalızadə, Vurğun Hüseynov, Adil Nağıyev, Tellur Mütəllimov, Mirabdulla Abbasov kimi futbolçular ümidlərini itirməsinlər. Hazırkı heyət göstərdi ki, əvvəlki baş məşqçilər kimi, Qurbanovun konkret oyunçuları yoxdu. Bu da millidən kənarda qalanlara daha çox çalışmaq əzmi verəcək.

 

Qurban Qurbanovun digər mesajı isə “turnir cədvəlindəki mövqeyə baxmıram” oldu. Yoxsa ən çox futbolçunu 5-ci yerdəki “Neftçi”dən çağırmazdı, “Səbail”, “Keşlə”, “Kəpəz” kimi autsayderlərə məktub göndərilməzdi.

 

Milli komandamız yeni baş məşqçi ilə uğur qazanar və ya qazanmaz; bu, başqa söhbətin mövzusudu (hərçənd 3 legioneri olan komanda ilə nəyəsə ümid etmək çətindi). Fakt isə ondan ibarətdi ki, Qurbanov hazırkı vəziyyətdə yığmaya layiq olanları siyahısına salıb, ədalətli seçimini edib. Bundan sonrası futbolçuların bacarığına qalıb.

 

Ruslan SADIQOV

0