O, komandasının sabah həlledici matçda qarşılaşacağı “İnter”in yaxşı heyətə malik olduğunu qeyd edib: “Rəqib güclü komandadır. Heyətində yüksək səviyyəli futbolçular var. Qol imkanlarından, standard vəziyyətlərindən lazımınca istifadə edir. Bu da ilk növbədə hündürboylu futbolçularının sayının çoxluğu ilə bağlıdır”. Rəqibi üstələmək üçün meydanda topla çox davranmağı, yerlə oynamağı vacib amil hesab edən A.Mircavadov final matçının baxımlı keçəcəyini bildirib və komandasında psixoloji durumun yaxşı olduğunu söyləyib: “Kubok oyununa son şans kimi baxmırıq. Bu mənada avrokuboklardan kənarda qalmaq təhlükəsinə görə psixoloji gərginlikdə deyilik. Sadəcə, finalın bir oyundan ibarət olması öz sözünü deyir. Daha diqqətli olmalıyıq. İnşallah, qələbə qazanıb UEFA kubokuna vəsiqə qazanarıq”.