Topaz Premyer Liqasında 2018-ci ilin ən yaxşı komandası “Neftçi”di. Apasport.az saytının məlumatına görə, “Qarabağ”ın XXVII turda “Keşlə”yə uduzmasından sonra Tərlan Əhmədovun yetirmələri mövsümün ikinci yarısının liderinə çevrilib.

“Ağ-qaralar” 13 görüşdə hamıdan çox qələbə qazanıb (8), hamıdan çox qol vurub (20) və xal sayında hamını arxada qoyur. “Neftçi” və “Qarabağ” eyni sayda – hərəyə 2 dəfə uduzsa da, bakılıların zirvəni əldən verməsi inandırıcı deyil. “Neftçi” son turda “Kəpəz”lə heç-heçə etsə də, ilin arxada qalan hissəsinin ən yaxşısı adına sahib çıxacaq. Çünki belə vəziyyətdə xal hesabını bərabərləşdirmək imkanı qazanan “Qarabağ” “Qəbələ”ylə son turun matçında 6 qol vurmalıdı ki, bu da az qala mümkünsüzdü. Ən az qol buraxması ilə seçilən “Qarabağ” qış fasiləsindən sonra 25 xal toplayıb.

Mövsümün ikinci yarısının 3-cü ən yaxşı komandası isə “Keşlə”di. Yuri Maksimovun yetirmələrinin hesabında 20 xal var. “Sumqayıt”da qışdan sonra eyni qədər qazanc əldə etsə də, top fərqi bakılılarda daha yaxşıdı.

Mövsümün ikinci yarısının bombardiri İqnasio Herreradı. “Neftçi”nin futbolçusu 6 dəfə fərqlənib. 3 oyunçu 5 dəfə fərqlənib ki, onlardan ikisi “Qəbələ”ni təmsil edir. Ümumiyyətlə, 9 futbolçu bu il 4 və ya daha çox qola sevinib. Maraqlıdı ki, onlar arasında ardıcıl 5-ci çempionluğunu qazanan “Qarabağ”ın təmsilçisi yoxdu.

Bombardirlər: İqnasio Herrera (“Neftçi”) – 6, Baqali Dabo, Stiven Jozef-Monroz (hər ikisi “Qəbələ”), Amil Yunanov – 5, Cavid İmamverdiyev (hər ikisi “Sumqayıt”), Slavik Alxasov (“keşlə”), Dario Federiko (“Kəpəz”), Namiq Ələsgərov (“Neftçi”), “Filip Ozobiç (“Qəbələ”) – 4.