Beynəlxalq Həvəskar Boks Assosiasiyası (AİBA) dekabrın 10-da Rusiyanın paytaxtı Moskvada start götürəcək dünya kubokuna qatılacaq idmançıların yekun siyahısını açıqlayıb. Apasport.az saytının məlumatına görə, bu nüfuzlu yarışın mükafatları uğrunda hər çəki dərəcəsində 8 boksçu yarışacaq.

“Meqasport” İdman Sarayında təşkil olunacaq turnirdə Azərbaycan yığmasının üç üzvü iştirak edəcək. Dekabrın 8-də Moskvaya Famil Süleymanov (60 kq), Romal Amanov (64 kq) və Elçin Əlizadə (91 kq) yollanacaq. Dünya kubokunun qalibi olan boksçulara 10 min ABŞ dolları mükafat təqdim ediləcək. Gümüş mükafatçılar 5 min, üçüncü yeri tutanlar 2500 dollar qazanacaqlar.