Azərbaycan yığmasının yarımmüdafiəçisi Aleksandr Çertoqanov Rusiyaya yollanıb. Apasport.az saytının məlumatına görə, üç ay öncə alman baş məşqçi Hans-Yurgen Gede tərəfindən “Neftçi” klubundan kənarlaşdırılan 29 yaşlı ukraynalı futbolçu hazırda Moskvadadır. İstirahət etməklə yanaşı, gələcək karyerası haqda düşünən Çertoqanov vətənində çıxış etmək istəyir. Simferopolun “Tavriya” klubunun maraq dairəsinə düşən Aleksandrın karyerasını davam etdirmək üçün real variant Kiprdə olub. Ancaq milli komandamızın üzvü bu ölkədə çıxış etmək təklifini qəbul etməyib. Kiprdə oynamaq istəməyən Çertoqanovun “Neftçi” ilə müqaviləsi olduğu üçün başqa kluba sərbəst keçə bilməz. Belə olan halda, Aleksandrın transferinə görə “Neftçi”dən kənarlaşdırılan bir sıra futbolçular kimi kompensasiya ödənilməsi tələb olunur.