Rusiyanın “Mir” Dövlətlərarası Teleradio Kompaniyası Bakının “İnter” klubunun “MDB və Baltikyanı ölkələrin çempionlarının Birlik kuboku” turnirinin oyunlarını yayımlayacaq. Apasport.az saytının məlumatına görə, bu kanal Azərbaycan çempionunun yanvarın 18-də Finlandiyanın “İnter”, 20-də Latviyanın “Ventspils” klubları ilə “Olimpiya” manejində keçiriləcək görüşlərinin videoyazısını göstərəcək. Hər iki matç başlanandan 4 saat sonra - Bakı vaxtı ilə saat 18:00-da efirə veriləcək. Azərbaycan və Latviya çempionlarının görüşünün yayımı Moldovada da böyük maraqla gözlənilir. Hətta orada “İnter” – “Ventspils” oyunu “Moldova derbisi” kimi qələmə verilir. Məsələ ondadır ki, moldovalı futbolçulardan “İnter”də İon Testimitsianu ilə Oleq Şişkin, “Ventspils”də İqor Tsıqırlaşla Aleksandr Dedov çıxış edir.