Çexiyanın paytaxtı Praqada güllə atıcılığı üzrə Avropa çempionatı keçirilib. Apasport.az saytının məlumatına görə, yarışda mübarizə aparan Azərbaycan idmançıları uğursuzluğa düçar olublar. Belə ki, 6 təmsilçimizdən heç biri fəxri kürsüyə yüksələ bilməyib.

Pnevmatik tapança ilə 10 metrlik məsafədən hədəfə atəş açan Nigar Bağırova 380 xalla 10-cu yeri tutub. Ölkəmizin ən titullu güllə atıcısı, Afina Olimpiadasının bürünc medalçısı İradə Aşumova isə daha zəif nəticə göstərib. Ötən ay yığmamızın oynayan-məşqçisi təyin edilən Aşumova 371 xalla 46-cı pillədə qərarlaşıb.

Qadın idmançılarımızdan Mehriban Məcidova pnevmatik tüfənglə atəş açanların yarışında 75 nəfər arasında 73-cü sırada qalıb (378 xal). Yeniyetmə güllə atıcımız Aynur Qəhrəmanova isə “antirekord” müəyyənləşdirib: 364 xalla sonuncu, 76-cı yer.

Bu il axırıncı dəfə yeniyetmələr arasında qüvvəsini sınayan Ruslan Lunyovun da mükafat qazanmaq istəyi baş tutmayıb. 562 xal toplayan 20 yaşlı həmyerlimiz elə 20-ci yeri tutub. Beynəlxalq təcrübəsi yox dərəcəsində olan Məmmədəli Abdullayev 539 xalla 35-ci pillədə qərar tutub.

Beləliklə, Avropa çempionatında 6 güllə atıcımızdan heç biri təsnifatı adlaya bilmədiyindən, final mərhələsində çıxış etmək hüququndan məhrum olunub.