Ermənistan prezidenti Serj Sarkisyan milli komandasının Türkiyə ilə rəsmi oyununu izləməyə dəvət olunub. Apasport.az saytının məlumatına görə, Türkiyə prezidenti Abdulla Gül erməni həmkarına 2010-cu il dünya çempionatının seçmə mərhələsi çərçivəsində oktyabrın 14-də Bursa şəhərində keçiriləcək görüşə rəsmi dəvət göndərib.

Naxçıvana gələn Gül səfər öncəsi jurnalistlərlə söhbətində bildirib ki, Sarkisyan həmin oyuna baxmağa gələrsə, ən yaxşı şəkildə qəbul olunacaq, ona hər cür ehtiram göstəriləcək: “Mən Ermənistana şərtsiz gəldim. İdman centlmenlikdir. İdman centlmenliyi fəaliyyəti müəyyənləşdirən sahələrdən biridir. Ümid edirəm ki, Ermənistan prezidenti də həmin yanaşmanı edib, gələcək. Əlbəttə, mən rəsmi dəvət göndərdim. Və əgər bu, qəbul olunarsa, Ermənistan prezidentini ən yaxşı şəkildə qəbul edəcəyik”.