Azərbaycan futbol yığması peşəkar boks üzrə dünya çempionu Nikolay Valuyevin kefini pozub. Apasport.az saytının məlumatına görə, WBA versiyasında super ağır çəkidə planetin ən güclüsü olan idmançı Rusiya milli komandasının 2010-cu il dünya çempionatının seçmə qrup mərhələsi çərçivəsində yığmamızla Bakıdakı heç-heçəsindən (1:1) sonra çox məyus olub.

“Milli komandamızın son iki oyunu - Almaniya və Azərbaycanla görüşləri izləyə bilmədim. Çünki həmin vaxta hazırlıq prosesim, həmçinin məşq xarakteri daşıyan döyüşlərim təyin olunmuşdu. Amerikalı sınaqçı-rəqiblərə izah edə bilmərəm ki, bizim görüşlər futbol oyununa baxacağım üçün təxirə salınır. Fikirləşirdim ki, matçların videoyazısını izləyərəm. Ancaq Almaniyaya məğlubiyyət və Azərbaycanla heç-heçə haqda eşidəndə çox pərt oldum. Qanım elə qaraldı ki, bundan sonra videoyazını da izləmədim” - deyə Valuyev vurğulayıb.

Qeyd edək ki, dünya çempionu noyabrın 7-də britaniyalı Devid Heyllə döyüşdə titulunu qorumağa çalışacaq.