Çoxları qadınların döyüş növləri ilə məşğul olmasının qəti əleyhinədir. Çünki boks, karate, taekvondo, kikboksinq və digər belə növlər xanımlar üçün çox təhlükəlidir. Hətta bu, qadınların zahiri görünüşünə də pis təsir edir, onları bəzən çirkinləşdirir.

Ancaq yuxarıda qeyd olunanların rusiyalı idmançı Natalya Raqozinaya heç bir aidiyyatı yoxdur. 33 yaşlı bu xanım Qazaxıstanda doğulmasına baxmayaraq, Rusiyanı təmsil edir. O, həvəskar boksda ikiqat dünya, ikiqat Avropa və beşqat Rusiya çempionu, eləcə də Dünya Kubokunun qalibidir. Eyni zamanda Raqozinanın kikboksinqdə də böyük uğurları var: ikiqat dünya çempionu, Asiya çempionu və beşqat Rusiya çempionu.

181 sm boya malik Natalya son vaxtlar peşəkar boksa keçib. Cazibədar qadın indiyədək peşəkar rinqdə keçirdiyi 22 döyüşün hamısında qələbə qazanıb. Bunların 13-də nokaut qeydə alınıb. Ona “Rus çariça”sı ləqəbi verilib. Lakin gərgin məşqlər, ağır döyüşlər Raqozinanın gözəlliyi və sağlamlığı üçün təhlükəli deyil. Əksinə o, öz gözəlliyi ilə daha çox diqqət mərkəzinə düşür. Natalyanın çılpaq fotoşəkilləri bir sıra kişi jurnallarının üz qabığını bəzəyib.