Avropa Voleybol Konfederasiyası (CEV) kişi klubların yeni reytinq cədvəlini açıqlayıb. Apasport.az saytının məlumatına görə, siyahı Azərbaycan üçün uğursuz alınıb.

Belə ki, son 4 ildə komandalarımızın avrokuboklardan kənar qalması reytinq xalımızın 0-a düşməsi ilə nəticələnib. Bu səbəbdən də Azərbaycan cədvəldə xalsızların yer aldığı sonuncu – 35-55-ci yerlərə “şərikdir”.

Əgər kişi klublarımız yaranarsa və beynəlxalq arenaya çıxmaq “eşqinə” düşərsə həmin anda yalnız “Çelenc Cup”da 1 komanda ilə təmsil oluna bilərik. Təbii ki, bu da “wild card” sayəsində reallaşacaq. CEV kubokunda və Çempionlar Liqasında oynamağımız isə yaxın illərdə mümkün olmayacaq (ən azı yaxın 2 ildə).

Cədvələ Rusiya (435,34) başçılıq edir. İkinci yerdə İtaliya (403,34), üçüncü pillədə Polşa (396,67) qərarlaşıb.

Qeyd edək ki, kişilərin reytinq siyahısından fərqli, qadın komandalarımız ölkəmizi 4-cü yerə yüksəldib.