Millimiz sonuncu səbətdə
19 yaşadək futbolçulardan ibarət milli komandalar arasında Avropa çempionatının elit-raundunun püşkatması dekabrın 3-də baş tutacaq. Apasport.az saytının məlumatına görə, artıq püşkatma zamanı yığmaların yer alacağı səbətlər açıqlanıb.
İsveçrənin Nyon şəhərində keçiriləcək tədbir Bakı vaxtı ilə 14:20-də başlayacaq. Mərasimdə 28 komanda 7 qrupa bölünəcək. Bu üzdən də həmin komandalar hərəsində 7 yığma olan 4 səbətə paylanılıb. Püşk zamanı Rusiya ilə Ukrayna eyni qrupa düşə bilməyəcək.
Azərbaycan millisi püşk zamanı sonuncu – D səbətində yer alacaq. Bu da yığmamızın reytinqinin aşağı olması ilə bağlıdı. 2015-ci ilin yazında keçiriləcək və iyunun 3-dək yekunlaşacaq elit-raundda yalnız qrup qalibləri final mərhələsinə vəsiqə əldə edəcək.
A səbəti
İspaniya, İngiltərə, Rusiya, İtaliya, Hollandiya, Slovakiya, Monteneqro
B səbəti
Avstriya, Portuqaliya, İsveçrə, Ukrayna, Fransa, İsveç, İrlandiya
C səbəti
Xorvatiya, Almaniya, Polşa, Danimarka, Belçika, Serbiya, Gürcüstan
D səbəti
Çexiya, Bosniya və Herseqovina, Türkiyə, Norveç, Litva, AZƏRBAYCAN, Şotlandiya
Qeyd edək ki, 2015-ci il iyulun 6-19-da keçiriləcək final mərhələsinə Yunanıstan ev sahibliyi edəcək.