Sonuncu dəfə Premyer Liqanın XI turunda Lənkəranda oyun keçirən “Xəzər Lənkəran” sabah 46 günlük həsrətə son qoyaraq doğma arenada “Qarabağ”ı qəbul edəcək. Apasport.az saytının məlumatına görə, qarşılaşmanın Lənkəranda baş tutacağı çoxdan bilinsə də, “ağ-yaşıllar” hələ də hava durumuna görə narahatdı.

Meydançanın ot örtüyü yeni olduğundan, hələ də kövrəkdi və güclü yağış ay yarımdı çəkilən əziyyəti hədər edə bilər. Lakin cənub klubunun icraçı direktoru Höccət Hacıyev sabah güclü yağışın gözlənilmədiyini deyib: “Üç gündü Lənkəranda yağış var idi. Bu gün hava yaxşıdı. Stadiona baxan mütəxəssis artıq heç bir problemin olmadığını deyib. Təbii ki, yağış yağarsa, ot örtüyünə təsirsiz ötüşməyəcək. Amma etiraf etmək lazımdı ki, istənilən zonada güclü yağış ot örtüyünü ağırlaşdırır. İstənilən halda, sabah oyun Lənkəran stadionunda keçiriləcək”.

Qeyd edək ki, “Xəzər Lənkəran” son iki ev oyununu Bakıda keçirib. Komanda bu görüşlərdə “Neftçi” ilə qollu (2:2) heç-heçə edib, “Qəbələ”yə böyük hesabla (3:0) qalib gəlib.