“İşimizi davam etdiririk. Bu gün öz aramızda iclas keçirdik və bəzi məsələləri müzakirə etdik”. Bu sözləri apasport.az saytına açıqlamasında Şahin Diniyev deyib.
Məşqçilər Komitəsinin üzvü olan təcrübəli mütəxəssis AFFA-nın baş katibi ilə görüşü gözlədiklərini qeyd edib: “Elxan Məmmədovla görüşümüz hələlik baş tutmayıb. Həmin görüşdə vacib qərarlar qəbul ediləcək”.
Dekabrın 16-da AFFA-nın baş katibi Elxan Məmmədovla görüşməli olan Məşqçilər Komitəsinin istəyi baş tutmamışdı. Assosiasiya rəsmisinin başqa işləri olduğundan, görüş təxirə salınmışdı. Hələlik 4 nəfərdən ibarət olan MK baş katiblə sabah görüşməlidi. Son anda planda bir dəyişiklik olmasa, Elxan Məmmədov Məşqçilər Komitəsinin üzvlərini sabah qəbul edəcək. Görüşdə U-21-in baş məşqçisi və MK-nə 5-ci üzvün adı bəlli olacaq.