13:58 25-06-2015
news_image
1130
DİGƏR NÖVLƏR

“Brilyant liqa” Bakıda keçirilə bilər - FOTO

“Bakı Olimpiya stadionunda çoxsaylı atletika yarışları keçiriləcək. 2017-ci ildə Bakıda baş tutacaq İslam Həmrəylik Oyunlarının proqramına atletika növü daxildi”. Apasport.az saytının məlumatına görə, bu sözləri Azərbaycan Milli Olimpiya Komitəsinin vitse-prezidenti Çingiz Hüseynzadə deyib.

 

Azərbaycan Atletika Federasiyasının prezidenti olan Hüseynzadə bildirib ki, yeni inşa olunan Bakı Olimpiya stadionu idmanın atletika növü üzrə böyük miqyaslı yarışları qəbul edə bilər: “Hazırda Avropa Atletika Assosiasiyası (EAA) ilə danışıqlar aparılır. Qurum nümayəndələri bizim gözəl stadionumuzu görüb, yeniyetmə, gənclər və böyüklər arasında yarışların təşkilatçılığını təklif edir. Bu turnirlər arasında Avropa çempionatı da var. Növbəti ilin təqvimi tərtib olunmağa başlayanda, bu mövzuda daha konkret danışmaq olar”.

 

Hüseynzadə qeyd edib ki,  I Avropa Oyunlarının açılış mərasimi və atletika yarışlarının keçirildiyi idman qurğusu dünya çempionatını da qəbul etməsi mümkündü: “Bu stadionda dünya səviyyəli yarışların da keçiriləcəyinə ümid edirik. Mən “Brilyant liqa”nın mərhələsi və hətta yay dünya çempionatını nəzərdə tuturam. Avqustda Çinin paytaxtı Pekində Beynəlxalq Atletika Federasiyaları Assosiasiyasının (İAAF) prezidenti postuna seçkilər olacaq. Bu quruma yeni rəhbər təyin olunandan sonra onunla gələcəkdə ən böyük atletika yarışlarının Bakıda keçirilməsi barədə söhbət edəcəyik”.

 

İyunun 12-də Avropa Oyunlarının açılış mərasiminin keçirildiyi arena ayın 28-də bağlanışı da qəbul edəcək. Hüseynzadə bildirib ki, müasir idman qurğusu Olimpiya Oyunlarında da analoji tədbirləri qəbul etmək gücündədi: “Stadion Olimpiya Oyunlarının açılış və bağlanış mərasimlərini keçirmək üçün də hazırdı. Beynəlxalq Olimpiya Komitəsinin tələblərinə əsasən, bu mərasimlər üçün ən azı 80 min tamaşaçı tutumu olmalıdı. Bakı Olimpiya stadionu hazırda 68 min tamaşaçı tutumuna malikdi. Lakin arenanın layihələşdirilməsi zamanı əlavə tribunalar hesabına bu rəqəmin artırılmasının mümkünlüyü də nəzərə alınıb”.