14:52 22-11-2015
news_image

Cüdoçularımız Çində 3 günə 6 medal qazandılar

Çinin Qingdao şəhərində keçirilən cüdo üzrə Qran-pri yarışlarının üçüncü - sonuncu yarış günü də cüdoçularımız üçün uğurlu olub. Apasport.az saytının məlumatına görə, cüdo üzrə Azərbaycan milli komandası aktivinə daha 3 medal yazdırıb.

 

90 kq çəki dərəcəsində yarışan Ramin Qurbanov mübarizəyə ikinci turdan, yerli cüdoçu Ksun Jao Çenqi məğlub edərək qoşulub. Daha sonra Monqolustan idmançısı Otqonbatar Lxaqvasurenə qalib gələn Qurbanov 1/4 finalda kubalı cüdoçu Esli Qonzalesə uduzaraq təsəlliverici görüşlərə qatılıb. İdmançımız ilk qarşılaşmasında Böyük Britaniya təmsilçisi Enryu Bernsə qalib gəlib. Ramin Qurbanov bürünc medal uğrunda mübarizədə isə rusiyalı Kiril Voprosovu “ippon” fəndi ilə məğlub edərək qələbəni bayram edib.

 

100 kq çəki dərəcəsində Azərbaycanı təmsil edən Elmar Qasımov yarışa yaponiyalı Rutaro Qoto və gürcüstanlı Quram Tuşişvilini məğlub edərək başlayıb. 1/4 finalda isə o, argentinalı Hektor Kampos və koreyalı Hvanq Min-Hoya qalib gələn komanda yoldaşı Elxan Məmmədovla qarşılaşıb. Azərbaycan duelindən qalib çıxan Məmmədov yarımfinalda Qazaxıstan cüdoçusu Maksim Rakova uduzub. Lakin cüdoçumuz Ukrayna təmsilçisi Artem Bloşenkonu məğlub edərək bürünc medal qazanıb.

 

Elmar Qasımov da təsəlliverici görüşlərdə xorvatiyalı Zlatko Kumriç və almaniyalı Karl-Rixard Frey üzərində qələbə qazanaraq bürünc medala sahib olub.

 

Digər iki cüdoçumuz Məmmədəli Mehdiyev (90 kq) və Uşangi Kokauri (100+) isə ilk döyüşdə məğlub olaraq mübarizəni dayandırıb.

 

Bununla da, Azərbaycan cüdoçuları Çin Qran-prisini 6 medalla başa vurub.

 

İlqar Müşkiyev (60 kq) və Nicat Şıxəlizadə (66 kq) qızıl medal, Rüstəm Orucov (73 kq) gümüş medal, Ramin Qurbanov (90 kq), Elmar Qasımov (100 kq) və Elxan Məmmədov (100 kq) isə Qpan-prinin bürünc medalına sahib olublar.