19:07 09-12-2016
news_image
6191
DÖYÜŞ NÖVLƏRİ

Harçeqani Qran-prinin qalibi oldu - YENİLƏNİB

Bu gün Bakıda taekvondo üzrə Qran-pri turnirinin final mərhələsi start götürüb. Apasport.az saytının məlumatına görə, ilk gündə dayanq üzərinə Azərbaycan yığmasın iki üzvü çıxıb.

 

“Sərhədçi” Olimpiya İdman Mərkəzində təşkil edilən yarış saat 10:00-da başlayıb. 

 

Kişilər

58 kq

Millimizin gənc üzvü Roman Samodurov ilk döyüşdəcə bu çəkinin reytinqində ilk pillədə yer alan cənubi koreyalı Tae-Hun Kim ilə döyüşüb. Təəssüf ki, yekunda təcrübə öz sözünü deyib. Rəqib qələbə sayəsində mərhələ adlayıb.

 

80 kq

Komandamızın heyətində böyük ümidlər bələnilən Milad Beigi Harçeqani 1/8 finalda avstraliyalı Hayder Şkaranı sınağa çəkib. Qarşılaşma təmsilçimizin üstünlüyü ilə keçib. İlk raundda 8:0 hesabı ilə öndə olan Harçeqani növbəti hissədə üstünlüyü 14:0-a çatdırıb və vaxtından əvvəl qalib elan olunub. Olimpiya mükafatçımız 1/4 finalda cənubi koreyalı Heyeon-Vu Kimlə üz-üzə gəlib. Bu rəqib də taekvondoçumuza müqavimət göstərə bilməyib. Harçeqani asiyalını 17:1 hesabı ilə məğlub edib.

 

O, yarımfinalda meksikalı Rene Lizarraqa ilə qüvvəsini sınayıb. Harçeqani bu rəqibi də dayanq üzərinə çıxmağa peşman edib və görüşü vaxtından əvvəl xeyrinə bitirib. 18:0 hesablı üstünlük Miladı ikinci raundda finala yüksəldib. İdmançımız həlledici görüşdə də misirli Seif Eissaya göz açmağa imkan verməyib. Azərbaycan taekvonduçusu bu dəfə də vaxtından əvvəl qələbəyə sevinib. 3-cü raundun əvvəlində hesabı 12:0-a çatdıran Harçeqani Qran-pri turnirinin qalibi olub. 

 

Qeyd edək ki, yarışın ikinci günü millimizin heyətində Yaprak Eriş (57 kq), Ayxan Tağızadə (68 kq) və Radik İsayev (+80 kq) mübarizəyə qoşulacaq.