11:02 21-07-2018
news_image
269
DİGƏR NÖVLƏR

“Bakı 2019” Avropa Gənclər Olimpiya Festivalının loqosu təqdim olundu

“Bakı 2019” Avropa Gənclər Olimpiya Festivalının (AGOF) Təşkilat Komitəsi tərəfindən “Bakı 2019” AGOF-un rəsmi emblemi təqdim edilib. Azərbaycan Gənclər və İdman Nazirliyinin mətbuat xidmətindən apasport.az saytına verilən məlumata görə, Bakıda keçiriləcək 15-ci Yay Avropa Gənclər Olimpiya Festivalının loqosunun təqdimatı açılış mərasiminə rəsmi geriyə sayımı başlaması gününə təsadüf edib.

 

“Leo Burnett” adlı brend agentliyinin dizaynerlərindən ibarət yerli heyətin tərtib etdiyi bu emblem dostluq, ədalətli oyun və tolerantlıq ruhunu gücləndirən müasir, dinamik və çevik brendi əks etdirir. Brendin əsas məqsədi beynəlxalq idman yarışlarına ev sahibliyi edən ölkənin, şəhərin qədim mədəniyyətini, tarixini əks etdirmək, eyni zamanda,gələn il baş tutacaq idman yarışının bundan öncəkilərlə müqaisədə fərqini nümayiş etdirmək və milyonlarla insanı bir araya gətirən idman tədbirində “bax və hiss et ” şüarını nümayiş etdirməkdir. 

 

“Bakı 2019” AGOF-un emblemi Bakının irs və mədəniyyətini (“od” və qədim Azərbaycan naxışı olan “buta”-nı), bununla yanaşı, birlik və dostluq konsepsiyalarını birləşdirən möhtəşəm müasir memarlıq nümunələrini (“Alov Qüllələri” və “Heydər Əliyev Mərkəzi”ni) özündə  əks etdirir. Parlaq rəngləri canlandıran bu loqo yarışlara qatılacaq hər bir  iştirakçının müsbət enerjisi və Bakının çoxşaxəli gözəlliyini təsvir etdirən əhatəli çalarlar palitrasından ibarətdir.

 

Azərbaycan Respublikasının gənclər və idman naziri və “Bakı 2019” Təşkilat Komitəsinin sədr müavini Azad Rəhimov bildirmişdir: “Təqdim etdiyimiz bu emblem Azərbaycan mədəniyyətinin təzahürü olmaqla yanaşı, eyni zamanda,  Avropa Olimpiya hərəkatının əsl ruhunu və bütün dünyanı ilhamlandıran, milyonlarla insanı bir araya gətirməyi bacaran idmanda qalibiyyət uğrunda mübarizəni əks etdirir. Böyük idman ənənəsi olan, bir çox mötəbər yarışlara yüksək səviyyədə ev sahibiyi edən Azərbaycan, Avropanın gənc atletlərini Bakıda salamlamağı səbirsizliklə gözləyir”.