23:19 14-03-2020
news_image
104
AVRO-2020

AVRO-2020: Dekabrda keçirilmək variantı yarandı

Koronavirus pandemiyası üzündən keçirilməsi sual altına düşən AVRO-2020 ilin sonuna təxirə salına bilər.

Apasport.az saytının xarici mətbuata istinadən məlumatına görə, yarışı keçirmək üçün bir sıra variantları götür-qoy edən UEFA final mərhələsini dekabrda təşkil etmək variantını da nəzərdən keçirir.

Bildirilir ki, qurum rəhbərliyi ölkə çempionatlarının başa çatdırılması üçün iyun ayını klub və liqaların sərəncamına verəcək. İyunun 12-dən iyulun 12-dək təşkil olunmalı olan qitə çempionatı isə dekabrda keçirilə bilər.

UEFA-nın müzakirə etdiyi digər variant yarışın 2021-ci ilin yayında baş tutmasıdır. Lakin həmin vaxt FİFA klublararası dünya çempionatının yeni formatda keçirməyə israrlıdır. Bu səbəbdən dekabr variantı da real görünür.

Qeyd edək ki, martın 17-də UEFA üzvü olan 55 milli assosiasiya, həmçinin Avropa Klublar Assosiasiyası (ECA) və Futbolçuların Həmkarlar İttifaqı (FİFPro) birlikdə videokonfrans keçirəcək. Tədbirdə qitə futbolunda yaranan durum müzakirə olunacaq və müvafiq qərarlar verilə bilər.