12:19 24-05-2020
news_image
1079
FUTBOL

Beqoviç üçün ən ideal variant - "Qarabağ"

"Bornmut"un qapıçısı Asmir Beqoviçin karyerasını Azərbaycanda davam etdirmək ehtimalı bir qədər də artıb.

Apasport.az saytının məlumatına görə, Bosniya və Herseqovina millisinin qolkiperi "Qarabağ"a qayıtmaq üzrədir.

Hazırda icarə əsasında "Milan"da çıxış edən 33 yaşlı dəri əlcək sahibinin İtaliya klubunda qalmayacağı dəqiqləşib. "Rossonyerlər" onunla mövsümün sonunda vidalaşmaq qərarına gəlib. Premyer Liqanın aşağı pillələrində qərarlaşan bir neçə klub onu ikinci qapıçı kimi heyətə qatmaq niyyətindədir. Beqoviç həmçinin Çempionşip təmsilçilərinin də diqqət mərkəzindədir.

Lakin qapıçı özü milli komandaya qayıtdığı bir dönəmdə heyətdəki yerini möhkəmlətmək üçün yüksək liqa klubunda müntəzəm iştirak etmək arzusundadır. Bu baxımdan "Qarabağ" onun üçün ən ideal variant görünür. Üstəlik, Ağdam klubunun avrokuboklardakı iştirakı da Beqoviçin qərarına təsir edə bilər.

Qeyd edək ki, Asmir Beqoviçin "Bornmut"la müqavilə müddəti gələn ilin yayına qədərdir. Qolkiper cari mövsümün ilk yarısını icarə əsasında "Qarabağ"da keçirib.