12:23 02-06-2020
news_image
121
FUTBOL

Ömər Buludov: “Onlarsız oynamaq çox çətin olacaq” - MÜSAHİBƏ

“Neftçi”nin müdafiəçisi Ömər Buludov klubla müqavilə müddətini artırması ilə bağlı təəssüratlarını bölüşüb.

Apasport.az xəbər verir ki, 21 yaşlı futbolçu klubun rəsmi saytına müsahibəsində həm yeni sazişə qol çəkməsi, həm də mövsümün qalan hissəsinə hazırlıqla bağlı fikirlərini bildirib.

- "Neftçi” ilə daha 1 illik müqaviləyə imza atdınız. Yetirməsi olduğunuz klubda qalmaq sizin üçün nə deməkdir?
- Məncə, artıq bir söz deməyə ehtiyac yoxdur. Hamı bilir ki, "Neftçi” kimi klubun yetirməsi və əsas heyətin üzvü olmaq böyük şərəfdir. Doğma komandamda qaldığım üçün sevinirəm.

- Koronavirus pandemiyasına görə yaranmış uzun fasilə futbolçuların formasına təsirsiz ötüşməyə bilməz. Bəs siz formanızı nə dərəcədə qoruyub saxlaya bilmisiz?
- Mümkün qədər formada qalmağa çalışmışam. Bunun üçün evdə də olsa, məşqlərimi dayandırmırdım.

- İyunun 21-də Premyer Liqa matçları bərpa olunacaq. Azarkeşsiz oynamaq nə qədər çətin olacaq?
- Əlbəttə, azarkeşsiz oynamaq çox çətin olacaq. Azarkeş bizim 12-ci oyunçumuzdur. Onları yenidən tribunada görmək çox xoş olardı. Ümid edirəm ki, azarkeşlərin oyunlara gəlib bizə dəstək olmalarına tezliklə icazə veriləcək.

- Mövsümün son 8 oyunundan nə gözləyirsiz?
- Çempionluq uğrunda mübarizəni davam etdirəcəyik. Xal fərqini nəzərə alsaq çətin olacaq, amma heç kim düşünməsin ki, ikinci yerlə barışmışıq. Komandamıza güvənirəm, sonadək mübarizə aparacağıq.