18:16 16-09-2020
news_image
4086
FUTBOL

"Azərbaycan öz məmlətəkimizdir" - Fatih Terim

“Uzun illər sonra yenidən Bakıda olduğum üçün çox xoşbəxtəm”.

Apasport.az saytının məlumatına görə, bunu “Qalatasaray”ın baş məşqçisi Fatih Terim Avropa Liqasının II təsnifat mərhələsində “Neftçi” ilə keçiriləcək oyun barədə danışarkən deyib.

Təcrübəli mütəxəssis qarşılaşmanın oynanılacağı Bakı Olimpiya Stadionunda baş tutan mətbuat konfransında jurnalistlərin suallarını cavablandırıb.

- Qarşıda Super Liqada "Başakşəhər" və "Fənərbaxça" ilə oyununuz var. Sabah heyətdə rotasiya edəcəksinizmi?

- "Qalatasaray" avrokuboklara öyrəşən komandadır. İstənilən şərtlərdə sona qədər mübarizə aparmaq istəyir. Azərbaycan bizə yad olmadığı üçün püşkatma zamanı çox sevindim. Azərbaycan hər zaman sevgisindən şübhə etmədiyimiz, çox sevdiyimiz və gözəl qonaq olduğumuz bir yerdir. Bizim üçün "Neftçi" ilə oyun önəmlidir. Buna sabah qərar verəcəyəm. Hələ bəzi oyunçuların durumu bəlli deyil. Gərgin qrafikə bütün oyunçularımız hazır olmaldır. Bir və iki nömrələrin rəqabətini təmin etmək istəyirəm. Meydana çıxan üzərinə düşən vəzifənin öhdəsindən gəlməlidir.

- Bu gün Çempionlar Liqasının III təsnifat mərhələsində "Qarabağ"ın "Molde" ilə keçirəcəyi oyunu izləyəcəksiniz?

- Bəli, "Qarabağ"ın oyununu izləyəcəyəm. İnşallah, qələbə qazanarlar. "Qarabağ"ın "Neftçi" ilə yaxşı anlaşmadığını da bilirəm. 

- "Qaziantep"lə oyunda eyni anda 3 dəyişiklik etdiniz. Bu, "Neftçi" ilə matçla əlaqəli idi?

- Xeyr. Hesabda 3:0 önə keçdiyimiz üçün bu addımı atdım. Bəzi oyunçularımı riskə atmaq istəmədim. Həm də meydana daxil olan oyunçuları görmək istəyirdim. Arda, Babel və Fequlinin oyun praktikası ilə bağlı problemi var idi. Bu üzdən sıxıntı yaranmasının qarşısını almağı düşündüm.

- Meydanda qardaş olmur. Sabahkı görüdə hansı nəticəni gözləyirsiniz? "Neftçi"nin hansı oyununu izləmisiniz?

- Hava limanında, oteldə, burada əla atmosfer var. Öz evimizdəki kimiyik. "Neftçi" də yaxşı komandadır, iki oyununu izlədim. "Şkupi" və "Sumqayıt"la görüşlərinə baxmışam. Hər kəs qələbə qazanmaq istəyir. Meydan fərqli, ondan kənar fərqlidir. "Neftçi" "Qarabağ"la birlikdə Azərbaycanın ən önəmli iki komandasından biridir. Son matçda 0:2 hesabı ilə məğlub oldular. Qəribədir ki, bu mövsüm hələ səfərdə oynamayıblar.

- Rəqibin baş məşqçisi "Qalatasaray"ı keçəcəklərini deyib. Buna münasibətiniz necədir?

- İddialı adamdan xoşum gəlir. Bravo ona. Deməyəcək ki, bizi udacaqlar.

- Azərbaycanlı futbolçunun "Qalatasaray"da olması üçün nə lazımdır?

- "Qalatasaray"da oynamaq istəyi və yeganə seçim yeri bu klubun olması. Eyni zamanda "Qalatasaray" da bəyənirsə, məsələ yoxdur. Kaş belə ola. Bizim skautlarımız bu ölkəni də təqib edir.

- Yaxşı qapıçı komandanın yarısıdır. Musleranın zədəli olması sizdə narahatlıq yaratmır?

- Musleranın ayağının qırılması bizim də qırıldığımız an kimi görünür. O ana dönmək istəmirəm. Muslera bizim üçün bir qapıçıdan daha artıqdır. Qapımızda olması da əlavə güvən yaradır. Allah betərindən saxlasın. Tezliklə yaşıl meydanlara dönməyə çalışır. Amma digər qapıçılarımıza da güvənirik. Musleranın karyerasını bizim komandada bitirəcəyini də düşünürəm. Bu qədər xidmət edib və etməkdə də davam edəcək.

- Bir il sonra Türkiyə millisi burada AVRO-2020 oyunlarına çıxacaq. Arena barədə düşüncələriniz nələrdir?

- Türkiyə yığması iki oyununu burada keçirəcək. İnşallah, azarkeşlərlə olar. Azarkeşsiz keçirilərsə, yığmamızın bəxtsizliyi olar. Bakıda iki oyun keçirmişəm. 40-50 min azarkeş gəlmişdi. Türkiyə yığmasının Azərbaycanda oynaması böyük üstünlükdür. Bura öz məmlətəkimizdir. Çox gözəl arenadır.

- Oyunun azarkeşsiz olması hansı komandaya üstülük verəcək?

- Bizə üstünlük vermədiyi dəqiqdir. Azarkeşsiz oynamağın ləzzəti də yoxdur. Böyük komandaların böyük olmasının əsas səbəbi azarkeşləridir. Azarkeşsiz hər bir komanda bərabərləşir, bir fərqləri qalmır.

Rusan Sadıqov