19:09 24-10-2020
news_image
110
FUTBOL

"Qələbəni cəbhədə vuruşan əsgərlərimizə həsr edirik" – Füzuli Məmmədov

"Çətin olacağını bilirdik. "Keşlə”ni yaxşı analiz etmişdik. Xüsusi plan qurmuşduq”.

Apasport.az saytının məlumatına görə, bunu "Neftçi”nin baş məşqçisi Füzuli Məmmədov deyib.

Gənc çalışdırıcı Azərbaycan Premyer Liqasının VII turunun "Keşlə” ilə oyunsonrası mətbuat konfransında fikirlərini açıqlayıb. Məmmədov 1:0 hesablı qələbəni əsgərlərimizə və şəhidlərimizə həsr etdiyini bildirib: “Futbolçular da bu planı mən istədiyim səviyyədə meydanda yerinə yetirdilər. Göstərdikləri əzmkarlığa görə hər birinə təşəkkür edirəm. Bu arada futbolçuları oyuna kökləmək çətin olur. Çünki hər birinin ürəyi cəbhədədir. Bu gün bütün fikirlərini oyuna yönəltmələri çox xoş oldu. Qələbə qazanmaq həmişə xoşdur. Qələbəni cəbhədə vuruşan əsgərlərimizə, şəhidlərimizə həsr edirik. Hərbçilərimizin mərdliyi bizi daha da ruhlandırır. Belə ordusu, vətəndaşları, şəhidləri olan dövlətin vətəndaşı olduğumuz üçün fəxr edirik”.

Məmmədov komandasının bundan da yaxşı oynaya biləcəyini qeyd edib: "Komandamız yaxşı oynadı, amma bundan da yaxşı oynaya bilər. Çünki futbolçularımın potensialını bilirəm. Bəziləri tam keyfiyyətini ortaya qoya bilmədi ki, bunda meydan amilinin də rolu var. Bununla belə, istədiyim əzmkarlığı göstərə bildilər. Hər qələbə futbolçuda özünəinamı artırır və komanda daha yaxşı oynamağa başlayır. Sabir Buqrinin səviyyəli futbolçu olduğunu bilirəm, amma ötən oyunla müqayisədə bu gün tam istədiyimizi göstərə bilmədi. Həm də bir az yorğunluğu var idi. Buna görə də onu Saman Nərimancahanla əvəzləmək məcburiyyətində qaldıq. Saman da keyfiyyətli və təcrübəli futbolçudur. Mertə gəlincə, o, çox ağıllı futbolçudur. Düşünürəm ki, oyundan oyuna heyətdəki yerini möhkəmlədəcək. Onu limit səbəbindən deyil, layiq olduğu üçün meydana buraxırıq” (neftchipfk.com).