16:44 19-11-2020
news_image
169
FUTBOL

“Qarabağ”la oyuna final gözü ilə baxır – “Makkabi”nin baş məşqçisi

“Demək olar ki, üç gündən bir oyun keçirəcəyik. Beş həftə ərzində 11 matçdan ibarət marafondan üzüağ çıxmalıyıq”.

Apasport.az saytının məlumatına görə, bunu Təl-Əviv “Makkabi”sinin baş məşqçisi Giorqos Donis deyib.

Avropa Liqasında “Qarabağ”la eyni qrupda yer alan İsrail təmsilçisinin 51 yaşlı çalışdırıcısı ilin sonuna qədər onları çətin dönəmin gözlədiyini söyləyib: “İlin sonuna qədər çempionatda 8, Avropa Liqasında isə 3 oyunumuz var. Sıx təqvimdə çıxış etmək çətindir. Buna baxmayaraq, hər görüşə ayrı-ayrı yanaşacağıq, hər oyun bizim üçün final kimidir. Yaxşı formada olduğumuzu göstərməli, baxımlı oyun göstərməli və uğurlu nəticə əldə etməliyik”.

Qeyd edək ki, “Makkabi” ilə “Qarabağ” Avropa Liqasının V turu çərçivəsində dekabrın 3-də üz-üzə gələcək.