14:04 12-12-2020
news_image
1777
FUTBOL

Koronavirusdan atası və bacısı vəfat etdi – millimizin baş məşqçisinin

17 yaşadək qızlardan ibarət Azərbaycan millisinin baş məşqçisi Zamir Həsənov ağır itkilərlə üzləşib.

Apaspot.az saytının məlumatına görə, bunu 36 yaşlı çalışdırıcı feysbuk paylaşımında açıqlayıb.

O bildirib ki, özü və ailəsi koronavirus pandemiyasından əziyyət çəkib: “Noyabrın 19-da özümdə test nəticələri pozitiv çıxdığından 14 günlük karantinə qapanmağa məcbur oldum. Mənimlə demək olar eyni vaxtda 40 ildən çox pedaqoji əməyi olan, şəxsən özümün də müəllim və yaxın dost hesab etdiyim atam - Mənsur müəllim, ardınca 43 yaşlı bacım - Mənsurə bu amansız xəstəliyə yaxalandılar. Vəziyyət gündən-günə ağırlaşdığından hər üçümüz xəstəxana şəraitində müalicə almalı olduq”.

Həsənovun atası və bacısı koronavirusla mübarizədə vəfat edib: “Noyabrın 25-də atamın vəziyyəti anidən ağırlaşdı və haqqın dərgahına qovuşaraq dünyasını dəyişdi. Mənə ən çox əzab verən bundan 2 gün sonra xəbər tutmağımdır. Təəssüf ki, son mənzilə atamı çiyinlərimdə yola sala bilmədim. Ən çətin isə bacımın da bu bəladan mübarizə apardığına görə acımızı tam yaşaya bilmirdik ki, xəbəri olmasın və həyat mübarizəsini apara bilsin. Təəssüf ki, bacım Mənsurə də dekabrın 8-də bizim dərdin üzərinə dərd gətirdi. Atamızı bu dünyada olduğu kimi o dünyada da çox tək buraxmadı, o da bu həyatdan köçdü. Cəmi 13 gün aralıqla çox doğma adamlarımı itirdim”.

Yığmanın baş məşqçisi paylaşımda məqsədinin xəstəliyi ciddiyə almayanlara xəbərdarlıq olduğunu hesab edir: “Belə uzun təfərrüatı ilə yazmaqda məqsədim ətrafımda bu xəstəliyi hələ də ciddiyə almayanların olmasıdır. Xəstəxananın çölündə içəri düşmək üçün yalvaranları gördüyümdən, içəridə isə kömək üçün yalvarıcı baxışlarla həkimlərə zillənən gözləri hələ də unuda bilməməyimdən özünüzü qorumağı xahiş edirəm. Qapınızdan içəri girməmiş ciddiyə alın bu bəlanı”.