21:34 07-05-2021
news_image

4 güləşçimiz uduzdu, Manolova finalda - YENİLƏNİB

Bolqarıstanın paytaxtı Sofiyada güləş üzrə Dünya Olimpiya Təsnifat Turniri davam edir.

Apasport.az saytının məlumatına görə, ikinci yarış günündə qadın güləşçilər mübarizəyə qoşulub.

Azərbaycan millisinin xalçaya çıxan idmançısından 4-ü uduzduğu halda, 1-i finala yüksəlib.

Güləşçilərimizdən Türkan Nəsirova startda Ekvador güləşçisinə yenilib.

Alyona Kolesnik Qırğızıstan idmançısıyla qarşılaşmaya yaxşı başlasa da, ikinci hissədə "tuşe" ilə xalçadan məyus ayrılıb.

Tatyana Omelçenko ilk görüşdə sonuncu xal prinsipinə əsasən alman güləşçiyə məğlub olub.

Mübarizəyə 1/8 finaldan qoşulan Elis Manolova yunan həmkarını üstələyib. Təmsilçimizin növbəti görüşü daha gərgin mübarizə şəraitində keçib. Argentinalı güləşçi hesabda 2:0 öndə olsa da, Manolova geridönüş edib. Yekunda Elis sonuncu xal prinsipinə əsasən yarımfinala yüksəlib. Həlledici qarşılaşmada Asiya çempionu olmuş Qazaxıstan güləşçisinə gücünü göstərən yığmamızın üzvü finala adını yazdırmaqla yanaşı, Tokio Olimpiadasına vəsiqəni təmin edib. O, birincilik qarşılaşmasına sabah çıxacaq. 

Digər idmançımız Gözəl Zutova da debütdə rumıniyalı rəqibinə uduzub.

53 kq
1/8 final: Türkan Nəsirova - Luisa Melendres (Ekvador) - 1:4

57 kq
1/8 final: Alyona Kolesnik - Nuraida Anarkulova (Qırğızıstan)* - 8:7 (tuşe)

62 kq
1/8 final: Tatyana Omelçenko - Luisa Niemeş (Almaniya) - 1:1*

68 kq
1/8 final: Elis Manolova - Aqoro Papavasileu (Yunanıstan) - 4:0
1/4 final: Elis Manolova - Klara Vaskes (Argentina) - *2:2
1/2 final: Elis Manolova - Cəmilə Bakbergenova (Qazaxıstan) - 5:3
Final: Elis Manolova - Mimi Xristova (Bolqarıstan)

76 kq
Təsnifat: Gözəl Zutova - Katalina Axente (Rumıniya) - 2:5

Qeyd edək ki, yarışın ilk günündə mübarizə aparan 3 sərbəst güləşçimizdən heç biri lisenziya qazana bilməyib. Qadınlardan ibarət yığmamızda Olimpiada vəsiqəsinə Mariya Stadnik (50 kq) sahib olub. O, dünya çempionatında bu vəzifənin öhdəsindən gəlib.