11:03 04-06-2021
news_image
213
FUTBOL

Türkiyəli azarkeşlərə səsləndi – Elxan Məmmədov

“Türkiyəli azarkeşlərin ən çox diqqətini çəkən məqam “ay-ulduzlular”ın qrupdakı iki oyununu Bakı Olimpiya Stadionunda keçirməsidir”.

Apasport.az saytının məlumatına görə, bunu AFFA-nın vitse-prezidenti Elxan Məmmədov deyib.

Qurum rəsmisi AVRO-2020-nin Bakıda keçiriləcək A qrupu matçları ilə bağlı fikirlərini bölüşüb. Məmmədov hətta türkiyəli fanatlara səslənməyi də unutmayıb: “Türkiyə yığmasının oyunları təkcə qardaş ölkədə yox, Azərbaycanda da həyəcanla gözlənilir. Amma bu möhtəşəm stadionun tribunalarından oyunları izləmək üçün bilet almalısınız. Koronavirus pandemiyasi səbəbindən Bakı Olimpiya Stadionunun ümumi tutumunun 50 faizinə azarkeş qəbul ediləcək. Türkiyə millisinin fanatlarını Bakıda gözləyirik. Biletinizi onlayn sistemdən sürətli şəkildə ala bilər, komandanızı iyunun 16-da və 20-də stadiondan dəstəkləyə bilərsiniz”.

Qeyd edək ki, iyunun 11-də AVRO-2020-nin açılış matçında Romada İtaliyanın qonağı olacaq Türkiyə millisi ayın 16-da Uelslə, 20-də isə İsveçrə ilə Bakıda qarşılaşacaq.