00:48 11-06-2021
news_image
337
FUTBOL

Türkiyə - İtaliya oyunu ilə start götürür - AVRO-2020

Bu gün AVRO-2020-yə start veriləcək.

Apasport.az saytının məlumatına görə, yarışda qitənin 24 ən güclü komandası mübarizə aparacaq.

Avropanın 11 şəhərində, o cümlədən Bakıda keçiriləcək turnir 31 gün davam edəcək. Sayca 16-cı olan qitə çempionatının iştirakçıları hərəsində 4 komanda olmaqla 6 qrupda qüvvəsini sınayacaq.

A qrupu (Roma/Bakı): Türkiyə, İtaliya (meydan sahibi), Uels, İsveçrə
B qrupu (Kopenhagen/Sankt Peterburq): Danimarka (meydan sahibi), Finlandiya, Belçika, Rusiya (meydan sahibi)
C qrupu (Amsterdam/Buxarest): Niderland (meydan sahibi), Ukrayna, Avstriya, Şimali Makedoniya
D qrupu (London/Qlazqo): İngiltərə (meydan sahibi), Xorvatiya, Şotlandiya (meydan sahibi), Çexiya 
E qrupu (Sevilya/Sankt Peterburq): İspaniya (meydan sahibi), İsveç, Polşa, Slovakiya
F qrupu (Münhen/Budapeşt): Macarıstan (meydan sahibi), Portuqaliya (son qalib), Fransa, Almaniya (meydan sahibi)

Hər qrupda ilk iki yerin sahibi və üçüncülər arasında ən yaxşı göstəriciyə malik 4 komanda 1/8 finala yüksələcək. 51 matçın keçiriləcəyi çempionatın final matçı iyulun 11-də baş tutacaq.

2020-ci ildə keçirilməli olan, amma koronavirus pandemiyası səbəbindən bu ilə təxirə salınan AVRO-2020-nin açılış matçı İtaliyanın paytaxtı Romada təşkil olunacaq. Qardaş Türkiyə millisi A qrupunda İtaliya ilə üz-üzə gələcək.

AVRO-2020-nin final mərhələsi
I tur, A qrupu
11 iyun
23:00. Türkiyə - İtaliya
Baş hakim:
Danni Makkeli (Niderland)
Roma. Olimpiya stadionu

Qeyd edək ki, AVRO-2020-nin A qrupu çərçivəsində İsveçrə - Uels (12 iyun), Türkiyə - Uels (16 iyun) və İsveçrə - Türkiyə (20 iyun) oyunları, həmçinin 1/4 final mərhələsinin 1 görüşü Bakı Olimpiya Stadionunda keçiriləcək.