10:30 28-06-2021
news_image
496
FUTBOL

“Arxamca danışırlar ki, məni oynatmadı, ədalətsizdir” – Qurban Qurbanov

“Ədalətli olan insanlar problemli olurlar. Həmişə işimdə ədalətli olmağa çalışmışam”.

Apasport.az saytının məlumatına görə, bunu Lent.az saytına müsahibəsində “Qarabağ”ın baş məşqçisi Qurban Qurbanov deyib.

Ağdam klubunun çalışdırıcısı heyət seçimi zamanı həmişə ədalətli qərar verməyə çalışdığını, ancaq heç də hamının bundan razı qalmadığını etiraf edib: “Hamı məni ədalətli saymır. Futbolda elə bir pis vərdişlər var ki, meydana 11 nəfər çıxır və oyunçular nə qədər çox istəsələr də, arxamca danışırlar ki, məni oynatmadı, filankəsdən güclüyəm, ədalətsizdir. Bizim bilmədən ədalətsiz vaxtlarımız olur. Bəlkə mən bunu ədalətli görürəm, amma daha çox müzakirə olunsa, kənardakıların fikirlərini də nəzərə alsam, ədalətsiz qərar vermiş olaram. Özümdən və işimdən hər vaxt razı olmamışam. Dəfələrlə qalib gəldiyimiz matçlarda, çempion olduğumuz dönəmdə özümdən də, futbolçularımdan da narazı qalmışam”.

Qeyd edək ki, “Qarabağ” Qurban Qurbanovun rəhbərliyi altında ardıcıl 7 çempionluğun ardından ötən mövsüm qızıl medalları “Neftçi” ilə mübarizədə əldən verib.